Champion lai PSG ngam loh Suarez

Champions League group match khelh mekah champion lai Paris Saint Germain chu an mikhualna ramah Sporting Lisbon 2-1 in an hneh lo a, Portuguese club tan Luiz Suarez-a'n goal hnih a khung . Luis Suarez hi Liverpool leh Barcelona tana khel ṭhin Uruguayan striker kha a ni lo a, Colombian forward a ni.

Kum 28 mi Suarez hian nipui bazarah Sporting hi Spanish club Almeria aṭangin €25mtd-in an zawm a, tun season-ah Portuguese club tan inelna hrang hrangah match 30 khel tawin goal 22 a khung tawh. PSG laka goal hnih a khung theih avangin a hlutna pawh a sang sawt dawn.

PSG tan Achraf Hakimi-a'n AFCON khelh zawh hnuah training a la zawm thei lo a, a aiah Warren Zaire-Emery a ding tih loh chu an ṭhat dan berin French club an inlan. Lisbon-ah PSG-in ball chang tam zawk mah se goal khung an harsat. First half-ah goal a luh loh hnuin Colombian forward Luis Suarez-a'n minute 74-naah hmahruaina goal a khung.

French club tan substitute Khvicha Kvaratskhelia-a'n mawi takin minute nga hnuah siphurh a sut a, inhnehtawkthei dinhmuna an hnuah Suarez-a'n minute 90-naah chakna goal a khung. Sporting forward Suarez hian tun season Champions League-ah goal li a khung tawh.

Luis Enrique hote hian Sporting an hneh loh avangin last 16 an lut chiang lo a, match tawp berah Newcastle United an hneh lo a nih chuan knockout playoff khel thei dinhmunah an la ding.