Europa League : Aston Villa khingpui tur Fenerbahce

Europa League group match khelh chhunzawm a ni leh dawn a, zanin dar 11:15 hian Aston Villa chuan Fenerbahce luhchhuah tumin Turkey an pan. Unai Emery nauten hi Premier League match hnuhnung berah Everton an hneh lo a, Europa League lamah chet sual nawn an duh lo ang.

Aston Villa hi Europa League table-ah point 15 hmuin pathumnaah an awm a, a sang pariat aṭanga tlak theih dan la nei mah se knockout stage an khel a rinawm tawh zawk. Fenerbahce erawh 12-naah awmin point 11 an hmu tawh a, playoff khelh ngai lova round of 16 luh an inbeisei.

Villa tan khup hliam vangin hliam vangin Boubacar Kamara leh Ross Barkley te bakah Amadou Onana (mal) chu khel lo tur chiang an ni a, anni bakah John McGinn leh Jadon Sancho dinhmun a chiang lo bawk.

Inhliam ngah mah se tun season Europa League-a goal ruk khung tawh Ollie Watkins a awm dawn a, Watkins hi tun hnaia che ṭha tak Morgan Rogers bakah Emiliano Buendia ten an thlawp dawn avangin tlarhma lamah lungngaihna tur a awm lo.

Fenerbahce-in Premier League lo khel tawh Ederson, Fred, Nelson Semedo, Jhon Duran, Sofyan Amrabat, Marco Asencio te an kawl avangin Aston Villa hneh thei turin an ṭha tawk.

Europa League-a team 36 te hi vawi riat ṭheuh an inkhel a, an mual leh khualmualah match li ve ve an khel a, a sang pariatin round of 16 an lut nghal. Pakuana aṭanga 24-na ten knockout playoff an khel dawn thung.