A hautak dawn - Arteta

Arsenal manager Mikel Arteta chuan zanin dar 1:26-a Leeds United nen FA Cup third round an khelh tur a thlir lawk a, anmahni mual Emirates Stadium-a inkhel tur ni mah se team nem zawk anga ngaih lakah awlsam taka chak mai theih a nih loh tur thu a sawi lawk.

Arteta kaihhruaina hnuaiah Gunners an harhthar mek a, an match hnuhnung berah Manchester United an hneh avangin an phur vanglai tak a ni mek. Chutihrualin an khingpui tur Leeds hi Championship lama hmahruai mektu an ni a, zuam sual theih tur tak an ni dawn.

Spanish manager Arteta chuan, "An manager Marcelo Bielsa hi hun rei tak aṭanga ka hriat tawh a ni a, a naute a khelhtir dan phung hi a nghet ṭha a, rilru huaisen tak leh tum mumal tak nei an nih avangin hmachhawn an awlsam dawn lo," a ti. Argentine manager Bielsa hi Arteta pu hlui Pep Guardiola ngaihsan zinga mi a ni a, Arsenal manager thar hian a hrechiang khawp ang.

Spanish manager Arteta chuan season tharah Leeds hi Premier League lamah an hmel hmuh theih ngei a beisei thu a sawi a, English football inelna sangah kan hmu a nih pawhin a mak lo ang.FA Cup chungchang sawi zuiin Arteta chuan, "Player ka nih laia Wembley Stadium-a hun hnuhnung ka hmanna kha a ni a, ka la hre reng. Nomawi chawi kan tum a nih chuan he inelna hi kan ngaipawimawh tur a ni," tiin a sawi bawk.

Arsenal leh Leeds te hi FA Cup bikah vawi 17 an inhmachhawnna tur a ni der tawh a, an intawn hnuhnung ber erawh 2012 January thla daih tawh kha niin Thierry Henry goal khat hmangin North London club hian hnehna an chang a ni. Leeds manager Marcelo Bielsa chuan, "Premier League team ṭha an ni a, chak tura rinkai zawk pawh an ni. Man United nena an inkhel pawh kha ka en, amaherawhchu tun season Man United hi keini team pawhin kan hneh thei tho ang," tiin inrintawkna an neih san thu a sawi ve bawk.

Argentine manager Bielsa hian 2011-12 season khan Athletic Bilbao enkawl chungin Manchester United chu Europa League last 16 aṭangin a lo pet chhuak tawh, inringtawk taka ṭawng ngam turin sulhnu ṭha tak a nei hrim hrim.

Tun dinhmunah Gunners lamin hliam vangin Calum Chambers, Hector Bellerin leh Kieran Tierney te an la chhawr thei lo a, tlarhnung lam hi an buaina tur a ni leh ang. Leeds lam erawh striker Tyler Roberts dinhmun a chiang lo deuh tih mai loh chu buaina tur an nei lo.