Chelsea chakpuitu Caicedo

Chelsea chuan an manager thar Liam Rosenior hnuaia Champions League match an khelh hmasak berah an mikhual Pafos FC chu 1-0 in an hneh a, UCL league stage-a goal awmchhun hi midfielder Moises Caicedo khung a ni.

Stamford Bridge a inkhelah mualneitu an chungnung zawk a, midfield-a chhawr Reece James leh Caicedo ten chance hlauhawm nei nghalin goal hmaah an vanduai thung. Minute 15-na lekah Enzo Fernandez-a'n hmahruaina goal tauh lut angah inngai mah se foul a awm avangin pawm a ni lo.

Mikhual team Pafos an vanduai a, Cyprus club tan tun season Champions League-a goal hnih khung tawh Jaja goal shot chu Blues defender Reece James-a'n box chhungah a kutin lo khawih per mah se penalty pek an ni lo.

Second half-ah Chelsea-in inkhel thunun chhunzawmin goal erawh an khung thei lawk lo. Chelsea an vanduai reng lo a, minute 78-naah Pedro Neto corner pet aṭanga ball lo kal chu Caicedo-a'n an a tauh lut a, Blues chak nan a tawk.

Chelsea tan an chak bakah lawmna tur dang a awm a, inhliam vanga hun eng emaw chen khel thei lo Estevao Willian chu a inkhel leh thei tawh a, Brazilian forward hian second half-ah Reece James a thlak. London club tan tun season Champions League-a goal thum khung tawhtu Estevao inkhel leh thei hi thawk huaina tham tur a ni a, kar leha Napoli an hmachhawn hunah inringtawk takin an khelh phah ang

kar leha Napoli an tum tur chungchanga an zawhna Blues coach Rosenior-a'n chhangin, "Napoli hi team ṭha tak an ni a, a enkawltu Antonio Conte pawh coach ropui tak a ni. Mahse kan huphurh lo a, tunah chuan Crystal Palace-ah chiah kan insawrbing rih," a ti a, kar leha an hmachhawn tur Napoli an hlauh loh thu sawi pahin, Pathianni zana league match an khelh tur an ngaihtuah hmaska tur thu a sawi.

Chelsea hi UCL table-ah pariatna ni mekin, 13-na Atalanta nen an point hmuh zat a la inang a, direct-a last 16 khel lo thei dinhmunah an ding mek - Rosenior-a'n Napoli hlau lo mah se, UCL match tawp bera Italian club ṭha hmachhawn hi an châk lo ang.