New York Knicks an chak leh ta

New York Knicks chuan a zawna game li an chak tawh loh hnuah nimin zing khan an elpui Brooklyn Nets chu 120-66 in an hneh a, record thar siamin an chak chian ber ṭum an tawng.

Madison Square Garden, New York-a inkhelah Knicks tan point guard Jalen Brunson chu langsar berin point 20 leh assist panga a nei. Miles McBride-a'n point 12 leh assist vawi li a a nei a, shooting guard Landry Shamet-a'n point 18 a nei a, center Karl-Anthony Towns-a'n point 14 leh rebound vawi riat nei bawkin Knicks chak nan an thawh hlawk hle.

Nets tan Michael Porter Jr chuan point 12 leh Ziaire Williams-a'n point 11 nei mah se Nets chakpui nan a tawk lo. Team pahnih inkarah point 48 awmin Knicks an chak chiang hle. Nets point 66 hi 2015 hnua Charlotte Hornets-in Utah Jazz an hneh loh hnua NBA team-in point an score tlem ber ṭum a ni.

Point 20 neitu Brunson chuan,"Kan thawkrim a, tu nge kan nih kan tilang a ni. Kan result hian nitina hmasawn kan tumna kawngah min puiin ka ring," tiin an result chuan an thawhrimna kawngah a tihphur a rin thu a sawi.