Khualmualah Atletico an chak zo lo

Spanish club Atletico Madrid chuan Champions League inkhel pawimawhah Turkish club Galatasaray an hneh zo lo a, an mikhualna ramah an inhnehtawkpui.

Atletico-in hma takah Giuliano Simeone hmangin hmahruaina goal khung mah se Marcos Llorente-a'n an lamah a tilut a, 1-1 in an in draw.

Rams Park-a inkhelah ṭan aṭangin Atletico an hlauhawm nghal a, minute lina lekah Matteo Ruggeri cross chu Giuliano Simeone-a'n tauh lutin Atletico-in hma an hruai der. Goal khungtu Giuliano Simeone hi Atletico Madrid coach Diego Simeone fapa a ni.

Goal an chhuah hnuah Galatasaray an insiamṭha a, minute 20-naah Roland Sallai ball cross chu Atletico defender Marcos Llorente-a'n an lamah a tlawh lut palh a, keeper Jan Oblak tan tih theih a awm lo.

Team pahnihte an innawr chhunzawm a, Galatasaray tan AFCON khelh hnua lo kir Victor Osimhen leh Bayern Munich forward hlui Leroy Sane te goal hmaah an hriam tawk lo a, Atletico tan Antoine Griezmann leh Julian Alvarez ten goal an ken tel loh avangin team pahnihte point khatah an lungawi a ṭul.

Diego Simeone naute hi table-ah 12-naah awmin, point 10 an hmu a, playoff khelh ngai loa last 16 luh an la inbeisei. Galatasaray erawh 17-naah awmin point 10 an hmu a, a sang pariat zingah an tel theih dan awm mah se knockout stage lut turin playoff an khelh a rinawm tawh zawk.