Player 10-a khel Bayern-in last 16 lut

Nilaini zan Champions League inkhelah Bayern Munich chuan Harry Kane goal hnih hmangin 2-0 in Union Saint-Gilloise an hneh - match khat khelh tur la nei mah se, last 16 an lut chiang tawh.

Belgian club lakah Bayern defender Kim Min-jae-a'n red card a chawi a, German champion an buai phah lo - a dingchang zawkah an ṭang ta tho.

Allianz Arena-a inkhelah mualneitu Bayern-in inkhel an thunun tluan zak a, mikhual team Union SG in an ngam lo. First half-ah Bayern-in chance hlauhawm nei mah se goal an thun thei lo. Goal lut loin chawlhlawk an hmang.

Coach Vincent Kompany-a'n half time chawlh a hmang ṭangkai a, second half ṭan aṭanga reiloteah goal an khung nghal. Minute 52-naah Harry Kane-a'n Michael Olise corner pet aṭangin an hmahruaina goal a tauh lut. Minute thum hnu lawkah Kane bawk kan hmu a, English forward hian ama penalty hlawhchhuah chu an hmahruaina belhchhah nan a hmang leh a, Bayern an phur hle.

Bavarians phur lai takin red card an chawi palh - Kim Min-Jae chuan yellow card pahnihna a chawi avangin minute 63-naah hnawhchhuah a ni. Player kim loa an khelh hnuah Bayern an hnual phah lo a, inkhel an thunun chhunzawm. Goal hmaah erawh an vanduai a, Harry Kane-a'n penalty hlahin hattrick siam theihna chance a bawhpelh bakah Michael Olise-a'n keeper chauh a hmachhawn hnuah goal zawnah a pet thei lo bawk a, 2-0 in Bayern an chak.

Bayern hi table-ah pahnihnaah awmin an chungah Arsenal chiah an awm. Last 16 an lut chiang tawh a, group match hnuhnung berah PSV Eindhoven an hmachhawn ang.