UCL-a team hrang hrang dinhmun

UEFA Champions League-ah game week khat chauh khelh tur a awm tawh a, tling tawh leh tla tawh an awm rualin match hnuhnung ber an khelh dan a zira dinhmun la danglam thei an awm. UCL group match tawp ber hi January 28, Nilaini zan dar 1:30-ah a rual vekin an khel ang.

Europe inelna sanga berah hian team 36 an tel a, a sang pariatin last 16 an lut nghal dawn. Last 16 lutte hian knockout playoff an khelh a ngai dawn lo a, February thlaah match hnih an pumpelh thei ang. Pakuana aṭanga 24-na ten knockout playoff an khel dawn a, pakuana aṭanga 16-na te hi seeded team tur niin 17-na aṭanga 24-na te hi unseeded tur an ni. A tawi zawngin seeded team-te hi an inhmachhawn thei lo a, chutiang bawkin unseeded team hi an inhmachawn thei lo bawk. Table-a 24-na hnuai lam beisei tur a awm tawh lo. Team 36-a an tihpun aṭangin UCL aṭangin Europa League-ah a tlak thlak theih tawh loh.

Arsenal leh Bayern Munich ten last 16 an lut tawh a; Real Madrid, Liverpool leh Tottenham Hotspur te a chhe berah playoff seeded an ni tawh dawn. Champion lai Paris Saint-Germain, Newcastle United, Chelsea, Barcelona, Sporting CP, Manchester City, Atlético Madrid, Atalanta, Inter Milan leh Juventus ten playoff an lut chiang tawh bawk.

Borussia Dortmund, Galatasaray leh Qarabağ ten last 16 thlengin an la beisei thei vek. Marseille, Bayer Leverkusen, Monaco, PSV Eindhoven, Athletic Bilbao, Olympiacos, Napoli leh Copenhagen ten last 16 an lut thei tawh lo a, playoff-ah seeded an la ni thei thung.

Club Brugge, Bodø/Glimt, Benfica, Pafos, Union Saint-Gilloise leh Ajax ten last 16 an lut thei tawh lo a, playoff-ah seeded an ni thei tawh lo a, playoff-a unseeded nih dan a la awm thung. Club pali Eintracht Frankfurt, Slavia Prague, Villarreal leh Kairat ten beisei tur an nei tawh lo.