Mateta-a'n Crystal Palace chhuahsan a duh

French striker Jean-Philippe Mateta chuan a khelh mekna Crystal Palace chu chhuahsan a duh thu a sawi a, Premier League club dang emaw European club zawm a duh.

Kum 28 mi Mateta hian Palace-ah thla 18 daih contract a la nei a, Palace lamin contract thar ziahpui tum mah se Mateta berin ziak duh loin club dang zawm a duh zawk. Mateta hian tun season Premier League-ah goal riat a khung tawh a, amah duhtu pawh an hrawl hlawm hle.

Mateta dawrtu zingah Juventus an langsar a, mahse club lamin a man zat an chhiar pound maktaduai 40 chu an ngam loh avangin an inbiakna a tlawlh. Mateta ngaihventu zingah Aston Villa an tel nia sawi a awm bawk.

Crystal Palace coach Oliver Glasner chuan,"Mateta duhtu an awm a nih chuan a man kan chhiar zat pek a ngai, an pe thei lo a nih chuan thla 18 contract a la neih avangin a cham mai ang," tiin a sawi a, an striker chu man tlawm taka hralh an tum bik lo.

Season hmasa FA Cup champion Palace hi nipui laiin an player pawimawh Eberechi Eze-a'n Arsenal a zawmsan a, tun thlasik transfer-ah club captain Marc Guehi chuan Manchester City a zawm bawk. Player pawimawhte an chhuah nasat avangin coach Glasner a lungawi lo a, club board-in min phatsan a ti hial a, kar hmasa khan season tawp rualin Palace chhuahsan dawn tih a sawi tawh bawk.

Oliver Glasner hoin Palace-in tun season-ah beisei an pha lo a, league-ah 13 naah awmin relegation zone aṭangin point 11 chiahin an him. FA Cup-ah non-league club Macclesfield-in an pet tla tawh bawk - kartawp Premier League inkhelah Chelsea an mikhual dawn bawk.