Djokovic-a'n ram tiam a pan zel

Grand Slam title la hnem ber record chelhtu Novak Djokovic-a'n a record pawtsei turin hma lam a pan zel a, Australian Open second round-ah harsatna nei loin a chak leh ta.

Kum 38 mi Djokovic hian 6-3 6-2 6-2 in Italian qualifier Francesco Maestrelli a hneh a, Melbourne khawlum karah pawh Serbian star hian harsatna nei loin hnehna a chang zel.

Djokovic hian a kum a tam ve deuh tawh avangin indim a mamawh thu a lo sawi tawh a, round tir lamah set khelh tam loh chu thupui ber atan a nei.

Nikum khan Djokovic hian Australian Open semifinal thleng mah se, a keah hliam a neih avangin a inhnukdawk a, Wimbledon leh US Open-ah pawh semifinal lut mah se, hliam vang bawkin inhnuhdawh a ngai.

Kuminah fimkhur takin a inlan a, first round-a Pedro Martinez a hnehna ang zat chiahin Maestrelli a hneh ve leh ta bawk.

Djokovic chuan, "Maestrelli hi a hmain ka hre ngai lem lo a, tiang hun hi ka tawng ve ta fo mai. Mahse, chuvang chuan ka zuam ngawt chuang lo a, ka zah em em tho.

"Serve ṭha tak a nei a, a khel thei hle. Tawnhriat tlem neih belh zawng a ni a mamawh chu. Tennis khawvela hming chher turin theihna sang tak a nei a, chutiang taka a thlen san pawh chu ka duhsak em em a ni," a ti.

Djokovic hian Grand Slam match-ah qualifier emaw lucky loser emaw hneh loh a la nei ngai lo a, heng ho laka a record 37-0 chu Open era-a mipa record ṭha ber a ni.

Tennis player ropui hian Inrinniah Botic van de Zandschulp chu third round-ah a hmachhawn dawn a, hnehna a chang a nih chuan Grand Slam Singles-a vawi 400 a chakna a ni dawn - hetiang record siam thei hi an la awm ngai lo.

Djokovic hian world number one Carlos Alcaraz chu final hma chuan a hmachhawn thei dawn lo a, vawi hnih champion leh seeded no.2 Jannik Sinner nen erawh an chak chho zel a nih chuan semifinal-ah an intawng thei ang.