Barca-in beisei an la nei

La Liga hmahruaitu Barcelona-in Champions League knockout playoff khelh hah ngai loa last 16 khelh an la tum zel a, Nilaini zan khan Slavia Prague chu khualmualah 4-2 in an hneh.

Fortuna Arena, Czech Republic-a inkhelah khua a vawt a, -6C-ah an khelh avangin Catalan club hian harsa an ti deuh em aw, tih tur a ni a, goal khung hmasatu pawh Czech club hi an ni.

Minute 10-na lekah Vasil Kusej chuan mualneitu team tan goal hmahruai a khung a, Barca an hawihai chiang hle. Mahse, Hansi Flick-a hnuaia form em em mai Fermin Lopez hun a her chhuak a, goal hnihin a chhanglet.

Barca ṭantute chuan 2-1 hian chawlhlawk an hmang mai dawn emaw an ti tawh. Mahse, first half tawp nan minute khat chiah a awm tawh tihah Robert Lewandowski a chesual a, an lamah a tilut.

Goal khung tura luhtir Lewy-a'n goal a khung ngei a, an lama a khung avangin a pawi ta thung - 2-2 in chawlhlawk hman a ni a, second half-ah Barca an zuai phah lo.

Minute 60-naah Hansi Flick-a'n thutlukna pawimawh siamin, Marcus Rashford leh Dani Olmo te bench aṭangin a luhtir a, Olmo-a'n khelmualah minute thum chiah hun a hmang hman tihin, yard 18 vela hla aṭangin mawi zetin a thlawh lut.

Barca-in 3-2 in hma an hruai a, an la duhtawk mai lo. Minute 70-naah Rashford chuan Lewy tan siamsak ve lehin, Polish striker hian first half-a a tihsual thup nan goal-ah a chantir a, 4-2 in Barca an chak.

Catalan club-in hnehna an chan avangin direct-a last 16 luh beiseina an neih chu a nung ve leh ta a, table-ah pakuana an ni mek - top eight chinin last 16 direct-in an lut dawn.

Hansi Flick-a team hian UCL league stage-a an match tawp berah FC Copenhagen an mikhual dawn a, pakuanaah daih awm rih mah se, parukna Paris Saint-Germain te nen an point hmuh zat a inan avangin beiseina a la sang hle.