Wawrinka a la chuai lo

March 28-a kum 41 tling tawh mai tur Stan Wawrinka a la tar lo - Swiss tennis star hian Australian Open-ah third round a inhlangkai leh ta a, kum 1978-a Ken Rosewall hnua AO third round inhlapkai thei upa ber record a siam.

Wawrinka hian awlsam takin hnehna erawh a chang lo a, Kia Arena-a inkhelah 4-6 6-3 3-6 7-5 7-6(3) in Arthur Géa chu a hneh a, darkar li leh minute 33 zet an inkhel!

Tennis legend Roger Federer meuh pawhin, "Diesel" tih hial khawpa a koh Wawrinka hi a khingpui aiin kum 19 zetin upa zawk mah se, a chau lo zawk a ni a, world no. 198 Arthur Gea zawk hi a chau takzet tih hai rual a ni lo.

Wawrinka hian kum 2014 khan Australian Open-ah hian nomawi a lo chawi tawh a, mahse, a kum a tam ve tawh avangin kuminah tennis a mangṭha tawh dawn - tun inelna hi AO a khelh hnuhnung ber tur tihna a ni.

"Fans vang chauha la inkhel ka ni," titu Wawrinka hian hnehna a chan rualin a awm a chum a, a thusawi hmasak ber chu, "Ka chau takzet a ni," tih a ni bawk - a hneh tak Gea hi khawvel hriat ni lo mah se, a ngaihlu tih a chiang.

Kum 21 mi Gea-a'n Wawrinka ngam lo mah se, darkar li chuang a inkhelhpui theih avang ringawt pawhin theihna a nei sang tih a chiang a, a Grand Slam khelh hmasak berah second round a lut thei.

Wawrinka a hmachhawn hma hian qualifying match thum paltlangin main draw a invaw kai a, first round-ah pawh seeded no. 7 Jiri Lehecka hnehin, tennis khawvel a barakhaih.

Second round erawh a tan a khirh ta hret - a ngam loh Wawrinka hian third round-ah Taylor Fritz a hmachhawn dawn. Kum 28 mi Fritz hi seeded no 9 a ni.