Chelsea-in Douglas Luiz an ngaihven

Premier League club Chelsea chuan thlasik transfer-a squad tihchhah dan an ngaihtuah a, Juventus midfielder Douglas Luiz chu season tawp thleng loan-a hawh tumin an ngaihven mek.

Aston Villa midfielder hlui Luiz hian kum 2024 khan English club hi chhuahsanin, Juventus a zawm a, mahse, Italian club-ah beisei angin hmun a chang tam tawk lo.

Nipui transfer-ah khan loan-in Nottingham Forest a zawm a, mahse, match 14 chiah khelhsakin, assist vawi khat a nei a, Premier League club tenau-ah hmun a chang phak meuh lo - mahse, Liam Rosenior-a'n a duh!

Luiz hi a vanduai ve bawk - season ṭantirah malpui hliam vangin a inlan thei lo a, mahse, a dam hnuah coach Ange Postecoglou chu Sean Dyche-a'n thlak hmanin, league match hnihah chiah bul a la ṭan.

Blues hian midfield-a khel turin Moises Caicedo, Enzo Fernandez, Andrey Santos, Dario Essugo leh Romeo Lavia an nei a, mahse, Essugo leh Lavia hi hliam vangin an buai reng a, midfielder an mamawh hle.

Brazil tan pawha vawi 18 inlan thei Luiz hian Juve-ah beisei phak lo mah se, Villa-a a season hnuhnung berah khan match 53 khela goal 10 khungin, assist vawi 10 a nei a, a rintlak tih a lang chiang.

Chelsea hian coach thar Liam Rosenior hnuaiah match li khel tawhin, vawi thum an chak a, vawi khat an tlawm a, result an nei chhe lo - Pathianni zan dar 7:30 hian Crystal Palace an lenchilh zui dawn.

Blues hian Nilaini zan khan Champions League-ah Pafos chu 1-0 in an hneh a, he inkhelah hian captain Reece James chu lakchhuah ni mah se, coach Rosenior chuan an inven vang chauha la chhuak a nih thu a sawi.

English coach chuan, "Nilaini leh Inrinniah match kan neih reng avangin kan fimkhur. Reece hi hruaitu leh player ṭha bik a nih avangin a inkhelh zel kan duh a, chuvang chuan kan ven tel a ngai a ni," a ti.

Hetihlai hian an thiampuipa Cole Palmer pawh Pafos lakah a khel lo a, Rosenior chuan, "Ani pawh invenna tho a ni. Brentford nena kan inkhelah khan a nuam zan lo a, ani ang player quality hi chu 'risk' lakpui ka duh lo.

"Pathianni zanah erawh inkhel bul a ṭan theih ngei ka beisei a, chutiang tur chuan kan buatsaih bawk ang," tiin a sawi.