Alcaraz-a'n hnehna a chang leh ta

World number 1 Carlos Alcaraz chuan Australian Open last 16 a lut fel der a, nimin khan French tennis player Corentin Moutet chu 6–2, 6–4, 6–1 a hnehin, third round a paltlang.

Melbourne Park-a a Grand Slam match 100-na kheltu Alcaraz chuan, "A nihna dik tak sawi i la, Corentin ang player tum chu a awlsam lo hle. Mahse, nuam ti takin kan khel a, kan pahnihin kan khel ṭha hleah ka ngai," a ti.

Kum 22 mi tennis star chuan sawi zawmin, "Ka style angin ka khel chhuak thei a, ka rilru pe taka ka inkhel thei kha ka lawm hle," a ti a, quarterfinal luh inchuhna inkhelah Tommy Paul a hmachhawn ang.

American star, seeded no. 19-na Tommy Paul hian third round match-ah Alcaraz-a hnampui, Spanish mi Alejandro Davidovich Fokina chu a hneh - Paul hian Fokina lakah hian 6-1, 6-1 a hma a hruai laiin, hliam vangin Davidovich Fokina hi a khel tluan thei lo a ni.

Alcaraz hian Grand Slam nomawi paruk a chawi tawh a, French Open, Wimbledon leh US Open-ah te vawi hnih ṭheuh a champion tawh - Australian Open-ah erawh quarterfinal aia sang a la thleng ngai lo a, Grand Slam lak kim tumin a ṭang khawp ang.