Mizo nulain gold medal hlawh chhuak

Zemabawk tleirawl Vanlalthlamuanpuii (Nupuii) chuan Taekwondo inelnaah Mizoram tan gold medal a hlawh chhuak a, 2nd Federation Cup inelnaa Junior Under 55Kg-ah amah aia thiam zawk an awm lo.

Jaipur, Rajasthan-a neih inelnaah Nupuii hian a game hmasa berah Tamil Nadu aiawh chu 14-2, 2-0 in a hneh a, a match hnihnaah pawh harsatna tawk loin, Kerala lam tleirawl chu 12-0 2, 9-3 in a hneh.

Quaterfinal-ah inelna thlengtu, Rajasthan lam tleirawl tum mah se, a zam phah lo a, 14-0, 9-2 a paltlangin semifinal a lut. Final lut tur zawnnaah pawh Maharasthra aiawh chu 10-5, 16-2 in a hneh.

Final-ah hian Haryana tleirawl chu 5-3, 3-1 a hnehin a champion a, April 12-17 a neih tur, Junior World Taekwondo Championships-a India aiawh tur thlanna selection hmachhawn turin a tling nghal - selection a paltlang chuan Tashkent, Uzbekistan-ah India ai a awh dawn a ni.

Hetihlai hian Chanmari West nula Ramdingliani chuan senior category-ah bronze medal a hlawh chhuak ve bawk. Rami hi senior U53 kg huangah inlanin, a match hmasa bera a hmachhawn tur chu disqualify a nih avangin round of 16 a lut nghal.

Round of 16-ah hian Uttar Pradesh aiawh chu tumin, Point Gap hmangin, awlsam takin quarterfinal a lut a, a thiam pariat inelnaah pawh hian Gujarat aiawh chu 13-0, 7-2 a hnehin semifinal a lut zui.

Rami hian final-ah erawh India aiawha lo inlan fo tawh, UP aiawh tho Rishita Rai tumin, 3-5, 0-7 in a tlawm a, bronze medal-ah lungawi a zir a ṭul ta a ni.

Chanmari West nula hi Asian Games 2026-a inlan thei dinhmunah a ding zui a, bronze medal a lak avang hian India aiawh tur thlanna selection a hmachhawn thei ang - Federation Cup-ah hian Mizoram aiawhin Taekwondoin pali an feh chhuak.