Season tawpah Casemiro a chhuak dawn

Brazilian midfielder Casemiro-a'n tun season tawpa a contract hman zawh hunah Manchester United a chhuahsan dawn. Kum 33 mi Casemiro hian kum 2022 khan Real Madrid aṭangin pound maktaduai 70-in Old Trafford a pan a, Man United tan match 146 khel tawhin, Pathianni zana Arsenal nen an inkhelh hunah pawh hmun pawimawh a chang ang.

Casemiro hian Man Unitied hi FA Cup leh League Cup-ah a champion pui a, League Cup final-a Newcastle United an hneh ṭumin goal hmahruai a khung. Real Madrid-a a khelh laiin Champions League nomawi vawi nga zet a chawi a, Spain-ah sulhnu ṭha tak nei mah se United-ah erawh beisei a phak bik lo.

Nikum khan club neitu zinga mi Sir Jim Ratcliffe chuan, "Player ṭhenkhat chu an phu aia hlawh tam leh ṭha tawk lo an awm", tiin a sawi a, Casemiro hi a sawi chhan zingah a tel.

Chutihrualin Casemiro chuan, "Ka dam hun chhung Manchester United hi ka chawi nung zel ang. Tun hi mangṭha tih hun a la ni lo a, thla li chhung hian hmabak tam tak kan la nei a ni. Theihtawp kan la chhuah tlan a ṭul a, club hlawhtlin theih nan theihtawp ka chhuah zui ang," tiin a sawi.

Casemiro hian kar khatah £3,75,000 a hlawh a, United-in Brazilian midfielder an chelh loh hian season thara sum hman tur an ngah sawt dawn. Man United hian midfield tihchak an duh a, an lei tum zinga mi Elliott Anderson, Carlos Baleba leh Adam Wharton te hi hlawh tlem zawka chhawr theih tur an ni. Khelmual chhungah Casemiro hmun ruak luah khat a harsa dawn a, chutihrualin squad siksawi erawh a awlsam phah thung ang.