Player kan lei dawn lo - Slot

Liverpool head coach Arne Slot chuan thlasik transfer-ah player lakluh tumna an neih loh thu a sawi a, hetihrual hian hun ṭha an nei a nih chuan bawhpelh an tum chuan loh thu a sawi.

Premier League champion Reds hian nipui transfer-ah khan player lakluh nan pound maktaduai 450 bawr vel an seng a, an player lei Florian Wirtz leh Alexander Isak hmangin British transfer record fee vawi hnih ngawt an siam.

Mahse, Reds an vanduai a, hliam vangin an talbuai hle. Tun dinhmuna player langsar inhliam zingah striker Isak, defender pahnih Conor Bradley leh Giovanni Leoni te an tel a, hei vang hian thlasik-ah an bazar mai ringtu an tam.

Mahse, Slot chuan, "Tun dinhmunah chuan player thar kan lakluh ka ring lo. Chutihrual chuan kan squad tihchhahna tur player lakluh theihna remchang kan nei a nih chuan bawhpelh erawh kan tum chuang lo ang. Tunah tak erawh inthuam ṭhat tumna kan nei rih lo," a ti.

Liverpool hian nipui transfer-ah sum an seng na viau chungin beisei an phak lo. Premier League-ah champion beiseina a bo tawh a, League Cup aṭangin an tla tawh bawk.

Mahse, Reds hian Champions League-a an match hnuhnung berah Marseille chu 3-0 in an hneh a, last 16 lut turin an chance a ṭha hle. Slot chuan, "Ka player-te nen hian ni tin hnathawk ho kan ni a, an theihna sanzia ka hria.

"Chuvang chuan UCL-ah pawh thui tak kan kal ka ring. Chutihrual chuan hma hun sawi lawk a harsa a, ka player-te an dam kim phawt chuan kan ṭha tawk a ni," a ti.

Dutch coach chuan sawi zawmin, "Mahse, football-ah chuan inrin loh laiin hliam kan nei fo. Leoni, Isak leh Bradley te rei tak ka chhawr thei dawn lo, tih hi ka inring bik lo. Mahse, he team hian kan dam ṭhat phawt chuan eng team pawh kan hneh thei tih kan pholang tawh.

"Hei vang hian ka team hi ka ring tawk a, player inhliam neih chungchang sawi lawk theih loh mah se, hliam nei ṭhin pawh ni ila, a ṭha ber hlawh chhuak turin theihna kan nei," a ti.

Liverpool hi UCL-ah chak zo chiah mah se, league-ah erawh match li zet a zawnin an chak zo tawh lo a, zanin dar 11:00-a Bournemouth an lenchilh hunah he thawnthu hi thlak danglam an tum ang.