Bergvall a chawl rei dawn

Tottenham Hotspur midfielder Lucas Bergvall chu a ke rek hliam avangin a chawlh rih a ngai dawn a, a chawlh chen tur hi chiang taka tarlan la ni lo mah se thla thum tal chu a chawlh a ngai dawn.

Sweden international Bergvall hi Thawhlehni zana Borussia Dortmund nen Champions League-a an inkhelh ṭum khan second half-ah a inhliam a, inkhel chhunzawm tum viau mah se thlak a ni thung. Spurs medical team ten a hliam hi engtiang chiaha na nge a nih an endik dawn.

Kum 19 mi Bergvall hian February 2024 khan Spurs hi a zawm a, tun season-ah match 26 khel tawhin player pawimawh zinga mi a ni.

Tun season-ah Tottenham hian coach Thomas Frank-a hnuaiah beisei an pha lo a, table-ah 14-na niin relegation zone aṭangin point 10 chiahin an him. Spurs ṭantute an coach lakah an lungawi tawh lo a, Frank-a lakah rinna nghat ngam tawh loin ban an duh thu an au chhuahpui mek.

An buaina belhchhah turin inhliam an ngah a - James Maddison, Rodrigo Bentancur, Mohammed Kudus, Dejan Kulusevski, Richarlison leh Ben Davies te chu inhliam vangin an chawl mek a, Joao Palhinha dinhmun a chiang lo bawk. Zanina Burnley an tlawh hunah an chak lo leh a nih ngat chuan Frank-a dinhmun a derthawng lehzual ang.

Thu lawmawm erawh hun rei tak hliam vanga a chawlh hnuah Dominic Solanke a lo kir a, UCL match hnuhnung berah goal a khung nghal. Zanin dar 8:30-a Burnley an hmachhawn hunah Solanke hi Spurs innghahna a ni ang.