Juventus hmachhawn tur Napoli

Kar tawp Serie A inkhel turah Juventus chuan Napoli chu Pathianni zan dar 10:30-ah an mikhual dawn a, team pahnihte top five-ah awm ve vein point li chauhin an inthlau a, inkhel hmuhnawm a beisei ngam.

Turin club Juventus hian league match an khelh hnuhnung berah Cagliari an hneh lo a, Champions League match khel chhunzawmin Jose Mourinho enkawl Benfica 2-0 a an hneh leh tawh avangin inrintawkna an ngah sawt ang.

Napoli erawh league table-ah pathumnaah an awm a, Milan club pahnih chiah tluk loin champion an inbeisei ve mek. Chutihrualin UCL match hnuhnung berah player kim loa hun tam zawk hmang Copenhagen lakah an chak zo lo a, Serie A lamah chet sual nawn an duh lo ang.

Juventus tan striker Dusan Vlahovic leh defender Daniele Rugani te chu an la inkhel thei dawn lo zel a, player dang erawh an dam kim. UCL match hnuhnung bera goal khungtu midfielder pahnih Weston McKennie leh Khephren Thuram te an rintlak a, Kenan Yildiz leh Jonathan David te an awm bawk avangin an ngaihtuahawm loh.

Napoli-in inhliam an ngah hret a, David Neres, Amir Rrahmani leh Matteo Politano te chu hliam vanga khel lo tur chiang sa an ni. Chutihrualin hliam vanga hun rei tak chawl tawh Romelu Lukaku chu match hmasa lamah bench lamah hun a hmang leh thei tawh a, Juventus lakah bul a ṭan kher loh pawhin a khelh a rinawm. Lukaku awm lo mah se Manchester United aṭanga an hawh Rasmus Hojlund a awm tho avangin Napoli tan manganna tur a awm lo a, Scott McTominay leh Stanislav Lobotka ten an thlawp dawn bawk avangin Antonio Conte naute hi Juventus hneh turin an ṭha tawk.