Harry Kane leh Bayern hmaah Augsburg

Tun season Bundesliga-ah Bayern Munich hneh theitu an la awm lo a, zanin dar 8-ah Harry Kane-a leh a ṭhiante chelh tumin Bayern hmaah Augsburg an ding dawn.

Vincent Kompany naute hi tun season-ah an khel ṭha hle a, league-ah fal taka hmahruaiin UCL lamah pawh an che ṭha a, match khat khelh tur la awmah knockout stage an lut tawh. UCL-a an match hnuhnung berah red card hmu chunga inkhel thununtu an nih theih avangin Bayern hian inringtawk takin Augsburg an mikhual a rinawm.

Bavarians tan Harry Kane chu tlarhma lamah an innghahna a ni leh dawn a, English forward Kane hian tun season-ah Bundesliga-ah ringawt goal 21 a khung tawh a, amah hnaih bertu a teammate Michael Olise chuan goal 10 a khung tawh bawk. Kane thlawp tur hian Olise bakah Serge Gnabry leh Luiz Diaz te an awm a, tun season kal mekah Europe-a hmatawng hlauhawm berte an ni.

Bayern tan inhliam avanga hun rei tak chawl tawh Alphonso Davies leh Jamal Musiala te an lo kir leh tawh a, Bayern squad a chhah sawt. German midfielder Musiala hi league match hnuhnung berah bench aṭanga lutin assist a nei a, a dam ṭhat phawt chuan a team tan a ṭangkai thei hle. Canadian full back Davies pawh UCL match hnuhnung berah bench aṭangin a lut ve bawk.