Barcelona-in Roger an duh

Ousmane Dembele a inhliam leh tak avangin Barcelona chuan a hmun ruak luah tur an zawng nghal a, Spanish chanchinbu lar Marca chuan Catalan club hian Roger Marti lakluh tumin a club khelhna Levante an dawr niin an tarlang. 

Kum 29 mi Roger hian tun season La Liga-ah goal 10 a khung tawh a, mahse Levante hian euro maktaduai 30 vel an chhiar avangin Barca hian a to an ti hret niin a lang.

Barca hian Luis Suarez (Real Zaragoza), Ante Budimir (Mallorca), Cristhian Stuani (Girona), Loren Moron (Betis) leh Lucas Perez (Alaves) pawh an duh zingah an telh a, an lak ber turah thu chiang a la awm lo. 

Spanish football transfer danah Barca hian 'emergency signing' an nei thei - hemi tur hian player pakhat chu squad aṭanga an paih chhuah a ngai a, chu player chu thla nga tal a inhliam a ngai bawk. 

Barca hian thla ruk chawl tur Dembele hi tun season atan squad aṭanga dah bo an tum a ni - zanin dar 8:30-ah league match khel turin Getafe an mikhual dawn a, hmahruaitu Real Madrid chu point thumin an phak lo mek.