India aiawhin R. Mala feh chhuak dawn

Mizo boxer Malsawmtluanga chuan India aiawhin Spain-ah inelna a hmachhawn dawn. R. Mala telna tur Boxing Tournament hi February 1-8, 2026 hian Lucis, Alicante, Spain-ah neih a ni ang. India team hian January 31, Inrinni hian an training-na hmun Patiala, Punjab aṭangin inelna neihna hmun tur Spain an pan ang.

India aiawh hian coach, physio bakah R&J telin mi 25 an feh chhuak dawn a, Mizo zingah Lunglei Electric Veng tlangval chiah a tel. R. Mala hi National Boxing C'ship hnuhnung berah silver medalist a ni a, nikum kumtawpa neih Mega Boxing-ah khan 70-75 kg-ah a champion.

Mizo boxer hmabak nei êng R. Mala hian kum 2022 khan Army Championship-ah gold lain best boxer-ah thlan a ni a, kum 2022 khan National Games (Gujarat)-ah silver a la leh bawk. Nikum khan Senior National Boxing Championship-ah Mizoram tan bronze a hnek chhuak a, kumin inelnaah Services tan silver a lak avangin havildar-ah a kai sang.

R. Mala chuan, "Boxing-a bul min ṭanpuitu coach Lalfakzuala leh hma ka sawn zel theih nana min puitu coach Ch.Lalmuanpuia chungah ka lawmthu ka sawi nawn leh a, anni zarah tun dinhmun thleng thei hi ka ni. India leh Mizoram ti hming ṭha turin theihtawp ka chhuah zel ang," tiin Vanglaini a hrilh.

India aiawh tur zingah Asian Games-a gold latu Narender Berwal (90+kg), World Cup 2025 gold medalist Hitesh (70 kg) leh bronze medalist Jadumani Singh (55 kg) bakah hmeichhe lamah Oympic Toyko bronze medal latu Lovlina Borgohain (75 kg) te an tel a ni. Head coach hi Kuttappa Chenanda Achaiah a ni a, coaching staff zingah Olympian Dharmendra Singh Yadav a tel bawk.