Alcaraz a kal zel

Australian Open-a champion tumin Carlos Alcaraz pawh a kal zel a, nimin khan seeded no. 19 Tommy Paul chu straight set-in, 7-6 (8-6) 6-4 7-5 in a hneh a, hnehna chang tur hian darkar hnih leh minute 44 a mamawh - quarterfinal a inhlapkai ve leh ta.

Alcaraz hi Grand Slam quarterfinal a luh vawi 14-na a ni der tawh a, Open era-a kum 23 tlin hmaa Grand Slam quarterfinal lut hnem ber record chelhtu Bjorn Borg leh Boris Becker (13) te record dinglai chu a khum.

Kum 22 mi lek ni chunga Grand Slam vawi ruk champion thei Alcaraz hi Australian Open khelh mekah hian set hloh a la nei miah lo a, amah ngei pawhin mak a tih thu a sawi chhuak.

Spanish tennis star chuan, "A nihna dik tak sawi ila, kei ngei pawhin mak ka ti zawk. Ka serve-ah hian hma ka sawn theih nan, rei tak chhung chu theihtawp chhuahin ka bei tawh.

"Ka serve-ah hmasawnna hmuh tur a awm hi ka lawm takzet a ni. Set tin zawh apiangin ka percentage pawh tihsan zel ka tum a, screen ka en reng mai a ni! A pumpuiin thlir ta ila, ka inkhelh tawh match liah khan ka serve kha hnehna ka chan nana ka hmanraw pawimawh tak a tling a ni," a ti.

Alcaraz hian kum naupangtê ni chungin Grand Slam nomawi paruk ngawt hlawh chhuak tawh mah se, Australian Open-ah erawh a ropui lo a, quarterfinal aia sang a la thleng lo - he thawnthu duhawm lo hi kuminah thaibo a tum ang.