Grand Slam vawi 400 chak Djokovic

Novak Djokovic-a ropuina chu belhchhahin a awm zel - Serbian tennis star hian Australian Open third round a paltlang leh ta a, Botic van de Zandschulp chu 6-3, 6-4, 7-6(4) in a hneh.

Australian Open-a vawi 10 zet champion a, champion hnem ber record chelhtu Djokovic-a tan Botic van de Zandschulp a hneh hi Grand Slam match 400 a chakna chiah a ni - Open Era-ah hetiang zat Grand Slam-a chak thei hi an la awm ngai lo!

Melbourne Park-a hnehna a chan hi Djokovic-a tan Australion Open vawi 21 a khelh tawha fourth round a luh vawi 18-na a ni nghal bawk a, a record hi a ropui thlawt - a chak zel chuan semifinal-a Jannik Sinner nen an inhmachhawnna chance a awm a, hei hi mipuiin an hmu châk dawn.

Jannik Sinner pawh hian fourth round-a lut tawh a, third round-ah Eliot Spizzirri chu 4-6, 6-3, 6-4, 6-4 a hnehin, vawi hnih ngawt a lo champion tawhna hmunah a lungthu kim nan champion a tum ruh.

Djokovic chuan, "Tun dinhmunah chuan Carlos Alcaraz leh Sinner hi khawvela player ṭha ber an ni a, tennis player dang zawngin kan khin phak loh level-ah an awm mek a ni," a ti a, tennis khawvela a naute chu a dah sang thiam hle.

Serbian star chuan sawi zawmin, "Mahse, court chhung kan lut a, kan inkhel a nih chuan engtik lai pawhin chance a awm reng. A bik takin hlawhtlinna tam tak ka lo chan tawhna AO court chhungah hian engpawh a thleng thei," a ti - nomawi a la beisei.

Djokovic hian fourth round-ah Jakub Mensik a hmachhawn dawn a, ani hian fourth round lut tur hian Czech lam mi Ethan Quinn chu 6-2, 7-6(5), 7-6(5) in a hneh a, Grand Slam-a fourth round a luhna hmasa ber a ni - a tawn tur Djokovic nen an inthlau hle.

Hetihrual hian Djokovic hi an inkhelah hian an disqualify teuh hle! Kum 38 mi tennis star hian 6-3 4-2 a hma a hruai laiin, Van de Zandschulp-a hlap a tihfuh theih loh hnuah, ball girl lam hawiin a ball a vua.

Mahse, hmeichhia hi lo insiamrem hmanin, ball hi a lo bum - fuh ngat se chuan Djokovic hi disqualify theih a ni a, hetiang deuh chiah hian kum 2020 khan US Open-ah a lo che tawh. Hemi ṭum hi chuan line judge chu a hlap per a, tournament a khelh ve zui an phal lo.

Inrinniah erawh Djokovic a vannei a, ball girl-in a lo bum hman hlauh! Djokovic chuan, "Kha thil thleng avang khan ngaihdam ka dil a, ka thinrim thutin thil tih ṭul miah lo ka ti a ni. Ka vannei takzet a, ball girl emaw midang emaw tu pawh ni se, an nawm lohna ka thlen avangin ngaihdam ka dil a ni," a ti a, a inthiam lo hle.