MSSC fin secy Muanpuia a thi

Mizoram infiamna tana mi pawimawh Dr. Lalmuanpuia (MF&AS) chu nimin zing dar 6:15 khan a thi a, nimin khan a chenna Bawngkawnah vui a ni.

Muanpuia hian Mizoram State Sport Council (MSSC)-ah Finance Secretary hna a chelh mek a, Weightlifting Association-ah Treasurer a nih bakah Mizoram Aerosport Association (MASA)-ah Vice President a ni bawk.

Thiamna lamah Muanpuia hi PhD (Physics) a ni a, sorkar hna (MF&AS) thawk chungin infiamna tan a thawh hlawk hle. Professional boxing tan sum leh pai bakah a thiamna a hmang nasa a, Mizo boxer-te leh infiammi ṭhahnem tak kawng sialsaktu niin chung zingah chuan NT Lalbiakkima leh Laldingliana te chu a langsar zual an ni.

Mizoram sports minister Lalnghinglova Hmar chuan, "Sports hmasawnna tura mi thawh hlawk, sports association hrang hranga inhmang, infiammite tana a hun leh sum ui loa pe chhuak ṭhin, infiammi ṭhahnem takte promote-tu a ni a, mithiam a ni bawk," tiin social media lamah a ziak a, Muanpuia a ui thu a tarlang bawk.