Wawrinka-a'n Australian Open a thlah ta

Tun season bak tennis khel tawh lo tur Stan Wawrinka chuan Australian Open a thlah fel ta a, kum 2014-a a lo champion tawhna tournament-ah hian a hmel kan hmu leh tawh ngai dawn lo.

Wawrinka hian Inrinni khan Australian Open third round-ah Taylor Fritz a hmachhawn a, 7-6(5), 2-6, 6-4, 6-4 in a tlawm - March thlaah kum 41 a tling ve mai tawh dawn a, a vanglai a phak tawh lo tih a chiang.

Heti chung hian Wawrinka hi a la 'fit' khawp - second round-a Arthur Gea nen an inkhelh phei kha chuan darkar li leh minute 33 ngawt a inkhel a, kum 40 a tling tawh tih chu awih a har zawk hial!

Mahse, kum 48 hnua Grand Slam third round khel thei upa ber Wawrinka-a Australian Open zinkawng chu a tawp ta a, Melbourne khawpui chuan Swiss tennis star hi an leilungah tennis khelin an hmu leh tawh dawn lo.

Mangṭha Australia

Wawrinka chuan, "Kum 20 liam ta chhung khan he hmunah hian thawnthu tam tak ka lo tawng a, ka lung a tileng dawn hle. Ka Grand Slam champion hmasak berna hmun a ni a, he hmuna ka inkhelh hi chuan ṭantu ka ngah em em zel," a ti.

Kum 40 mi Wawrinka hian kum 2014 final-ah khan Rafael Nadal hnehin nomawi a chawi a, French Open leh US Open-ah vawi khat ve ve a champion bawk - Wimbledon erawh a thlen san ber chu quarterfinal a la ni rih.

Wawrinka chuan, "Vawiin thlenga tennis ka la khelh chhan hi chu fan te leh he game ka hmangaih em vang hi a ni ber mai," a ti - a kum zat ngaihtuahin AO-ah hian mipui rin phak baka sang a la thleng tho.

Mahse, Grand Slam title pathum latu Wawrinka chuan, "Ka khelh dan hi mak ka ti hran lo. A chhan maw? Hetiang taka khel tur hian ka inbuatsaih nasa em a ni," a ti a, third round hial a la thleng thei chu a thawhrimna vang a nih thu a sawi.

Mangṭha Warinka

World number 3 dinhmun hial lo chelh tawh Wawrinka hi tunah chuan world number 139 a ni a, tun Australian Open-ah khel chhe lo mah se, chawlh a ngai ve tawh tih chu a lang chiang.

Kum 2016 US Open final-a a hneh tak Novak Djokovic pawhin Wawrinka uina thu sawiin, "Ka ṭhian leh ka elpui tia ka ko thei hi ka lawm hle - tennis hi a âtchilh tlat a, hei leh chen a inkhel thei hian min nawr kal nasa hle," a ti.

Djokovic chuan sawi zawmin, "Khelmual chhung leh pawna champion dik tak a ni a, ngainat loh a har hle. AO-a chawimawina a dawn zawng zawng hi a phu a, tennis a chawlhsan hunah chuan tennis khawvelin player ropui leh mi ṭha tak a chân dawn tihna a ni," a ti.

Wawrinka hian Grand Slam final vawi li a khel - AO final-a a hneh Nadal chu French Open 2017 final-ah khan a ngam lo thung a, French Open leh US Open final-ah Djokovic vawi hnih hmachhawnin, a hneh ve ve thung.

A la tawp lo

Wawrinka-a'n Australian Open mangṭha tawh mah se, kum tawpah a chawlh dawn chauh avangin kum tluanin inkhelhna hun a la nei a, a la champion lohna Wimbledon-a champion ngei pawh a châk khawp ang.

Kum 2008 Olympics-a doubles-a an ram tana gold latu Wawrinka chuan, "Kumina ka hmachhawpte ka la sawhsawn lo a, ka theihtawp chhuahin inelna ka hmachhawn zel ang. Tun kar thum chhunga ka khelh ṭhat em avangin nomawi ka chawi chho mawlh mawlh ang tihna pawh a ni chuang lo.

"Mahse, tuna ka thlen chin hian ka theihna chiang takin a pholang a, ka tih theih ka la hria. Chu chuan min tiphur hle a ni," a ti a, a chawlh kumah pawh tha thlah a tum lo.

Wawrinka hian inkhelh zawhah a chair hnuai aṭanga beer la chhuakin, Australian Open tournament director Craig Tiley nen court chhungah Australian Open chu an thlah.