Goal ruk khungtu Inter an sang zel

Serie A table hmahruaitu Inter Milan chuan Zirtawpni khan an mikhual Pisa chu 6-2 in an hneh a, Inter hian goal hnih chhuah hmasa mah se goal rukin an chhanglet a, Serie A-ah hma an hruai chhunzawm zel.

San Siro-a inkhelah mikhual team an hlauhawm hmasa zawk a, minute 11-na lekah Stefan Moreno chuan Inter keeper Yann Sommer tihsual nangchingin halfway line pelh hret aṭangin hmahruaina goal a khung. Inter insiamṭhat hmain Moreno bawk kan hmu - Italian striker hian corner aṭangin a goal hnihna a tauh lut leh a, Inter an hawihai.

Goal an chhuah hnuah Inter an hnual lo a, Piotr Zielinski-a'n penalty aṭanga goal khungin an si phurh a sut ṭhen. Minute hnih hnu lawkah Lautaro Martinez-a'n Federico Di Marco siamsak chu tauh lutin an si phurh a sut zo a, Argentine forward Martinez hian tun season Serie A-ah goal 12 a khungna chiah a ni. First half hun pek belhah tun hnaia che ṭha tak Pio Esposito chuan Alessandro Bastoni cross satliah chu a tauh lut a, Inter-in first half chhungin hma an hruai der.

Second half-ah Inter-in inkhel an thunun tluan a, goal erawh kan hmu lawk lo. Minute 82-naah Di Marco-a'n mawi takin a pet goal a, minute thum hnu lawkah Ange-Yoan bonny chuan khung ve lehin, injury time-ah Henrikh Mkhitaryan-a'n hnai tak aṭangin a tauh lut leh bawk a, Inter hi an hnuai chiaha awm AC Milan nen an inthlauhna a tam loh avangin chak loh an duh lo tih a lang a, an chak chiang hle.

Cristian Chivu naute hi point 52 hmuin hma an hruai chhunzawm a, an hmelma AC Milan aiin point rukin an sang zawk a, nizana Milan result a zirin an inthlauhna hi a la danglam thei thung.