Real chakna Mbappe goal hnih

Kylian Mbappe chuan Real Madrid tan goal hnih a khung a, Alvaro Arbeloa hoin hnehna an chang chho zel - Inrinni zan khan an mikhualna ramah Villarreal chu 2-0 in an hneh.

Villarreal khelmualah inkhel boruak a nung tawk lo a, first half-ah team pahnihin mipui beisei inkhel hmuhnawm an chhawp thei lo. Mahse, second half ṭantirah Mbappe vanneihna a her chhuak.

Vinicius Junior-a ball cross an lo petchhuah chu Mbappe ke bulah tak a hian a tla a, French striker hian harsatna nei loin goal-ah a chantir - Villarreal player-ten Vini-a'n ball a cross hma hian line pawnah ball a awm hman niin an sawi a, mahse, referee-in goal-ah a pawm.

Tun hnaia boruak nei ve reng Vini a khel ṭha a, mahse, goal hmaah a vannei lo - league match 13 zet chu goal khung loin a awm ta a, Real ṭantuten an au el leh ṭep tawh mai thei a ni!

Villarreal tan Gerard Moreno-a'n goal khungna remchang nei mah se, a vanneih zan a ni bik lo a, uiawm takin a thlawh over.

Hun pek belh minute linaah Mbappe-a'n chak a nemnghet ta nge nge a, ama hlawhchhuah penalty chu goal-ah a chantir - tun season-ah league match 19 a khelh aṭangin goal 21 ngawt a khung ta.

Real-in hnehna an chan avangin la Liga table chung ber an luah ve leh ta a, Barcelona an tlan pel. Mahse, nizan khan Barca an inlan a, an chak chuan point khatin Real hi an pel ve leh ang.

Season duhawm tak hmangtu Villarreal pawh table-ah palina an ni a, mahse, an league match hnuhnung pahnihah Real Betis leh Madrid ngam loin an tlawm a, Champions League khelh an tum chuan insiamṭhat ran an mamawh.