Chanmari an tho chhuak thei dawn em?

Mizoram Premier League Season 8 semifinal hnuhnung zawk chu zanin dar 7:30 hian RG Stadium-ah Chanmari FC leh Aizawl FC ten an khel dawn. I League club hian first leg-ah 1-0 in hnehna chang mah se nimin tlai khan Goa aṭangin Aizawl an rawn thleng chiah a, final lut tur hriatthiam a har hle.

Chanmari FC forward MS Dawngliana'n hliam vangin first leg-ah bul a ṭan thei lo a, second leg-ah erawh bul ṭan turin a inpeih. Dawngtea hian Chanmari leh Chhinga Veng te MPL nomawi a chawipui tawh a, boruak sangah a tawnhriat a pawimawh ang.

CFC manager Lalhmangaiha Sailo chuan, "Goal kan khung dawn. Aizawl FC an inven uluk a ṭul khawp ang. Semifinal hmachhawn turin kan inpeih," tiin Vanglaini a hrilh a, phur takin Dawngtea a dam tawh thu a sawi. Angaiha thusawi hi a thleng dik lo a nih chuan Chanmari FC hi semifinal an tla dawn. Amaherawhchu Chanmari hi tun season-ah vanneihnain a bawm a, tla tawh tura an inngaih hnuah Mizoram Police chu All India Police Meet khel tura an zin avangin semifinal an lut.

Vanneihna belhchhah turin Aizawl FC 

ṭha ber an hmachhawn dawn a, I League club zin chau lakah Chanmari hi rinkai zawk an ni dawn. Angaiha chuan, "Goal a pawimawh ber a, tunah hian kan dinhmun a chhe zawk. Pressure kan nei lo a, hlauthawnna nei miah loin kan khel thei ang," tiin Vanglaini a hrilh a, inkhel hmuhnawm tak hmuh tur a awm ngei a rinawm.

Aizawl FC coach Standly Rosario chuan, "I League hi kan tan a pawimawh a, chutihrualin MPL nomawi chawi ngei kan tum," tiin a sawi tawh a, chuvangin player ṭha kan hmuh ngei a rinawm. MPL-ah  hian foreigner pathum ziahluh theih a ni a, captain Alfred Kemah Jaryan leh defender Richard Kassaga te chu awm sa an ni. Tun season aṭangin MFA-in CRS a hman tawh avangin I League-a inziaklutte hi MPL-ah hman nghal theih a ni a, Standly-a'n Malian player pahnih striker Abdoulaye Kanoute leh midfielder Amadou Alou Sissoko inkarah duh a thlang thei ang.

AFC hian striker Kanoute hi an ziahluh zawk a rinawm a, foreigner an neih belh takah chuan Standly-a'n game plan thar a nei thei bawk dawn. I League ṭantute tana chanchin lawmawm chu William Lalnunfela goal hmaah a rawn che ṭha leh tawh a, Arrows laka goal leh assist vawi khat ve ve neitu Kolasib tlangval hi Rochharzela leh Isak Vanlalruatfela te ang thoa ven uluk a ṭul ang.

Aizawl FC-in I League-a Mohun Bagan nen an inkhelh ṭumin entu 7642 an nei thei a, MPL-ah pawh club hotute an ṭan phawt chuan entu tam zawk nei thei tur an ni. AFC hian ṭantu ruhkawl 'Red Army' an nei a, anni hian tualchhung lama an hmelma kumhlun Chanmari FC lakah tlawm an duh lo ang.

Chanmari FC-in league round-ah beiseina an neih tlem avangin first leg-ah pawh entu an ngah lo. An inkhelh hmasak ṭum hian 1-0 in chak lo mah se tunah chuan Aizawl FC an hneh thei tih an inhre tawh a, MPL nomawi a lungthu kim nana an chawi theih nan RG Stadium an pan ang.