Barca-in Real tlanpel lehnghal

Real Madrid chuan La Liga table chung ber luah ve zawk mah e, Spanish top flight league hmahruaitu an nih chhung a rei lo hle - Pathianni zan khan Barcelona chuan 3-0 a Real Oviedo hnehin table chung ber an luah lehnghal.

Xabi Alonso bantu Real hian coach thar Alvaro Arbeloa hnuaiah league match hnih a zawnin hnehna an chang a, hetih chhung hian Barca hi vawi khat tawlhthluin, rin loh takin Real Sociedad lakah an tlawm.

Real hian Inrinni zan La Liga-ah Villarreal hneh zuiin, Barcelona an tlan pel. Mahse, Pathianni zanah Catalan club inlan ve zuiin an chak a, point khata Real Madrid tlanpelin table chung ber an luah leh ta.

Barcelona tan Dani Olmo, Raphinha leh Lamine Yamal ten goal khat ṭheuh an khung a, Oviedo lamin a chhanletna tur an neih loh avangin Barca an chak a, Sociedad laka chak loh hnua an league match hmasa ber a nih avangin an thaw huai ang!

Beisei phak lo

Nou Camp-a inkhelah Barcelona inkhelin beisei a phak lawk lo a, a bik takin first half-ah an hriam lo hle - Catalan club hian kar laihawlah khan Champions League match an khel a, an fixture chep lutuk hi an chauhpui em ni chu aw, tih theih a ni.

First half tawp dawnah chawlhlawk hmaa an chance ṭha bera chhal ngam chu an nei a, mahse, Brazilian forward Raphinha hun duhawm chu Oviedo goalkeeper Aaron Escandell chuan ṭha zetin a dansak.

Barca hi tlawm ta se, point hnihin Real an phak lo dawn tihna a ni a, point piahlamah result-in Real a tiphur thei tih hriat tel chuan Catalan club ṭantute tan lungmuang taka awm a harsa ang!

Goal lut loin chawlhlawk hman zui a ni a, Barca fans an hlauthawng. Mahse, chawlhlawk laiin Hansi Flick-a'n a naute a fuih ṭha tih a chiang a, second half an khelh meuh chuan thawnthu a danglam tawh.

A sur ta

Minute 52-na a ni a, Barca fan-te hlauhthawnna chu beng daihin a awm - Dani Olmo-a'n Catalan club tan goal hmahruai a khung a, Barca an hawikir leh tawh lo. Minute nga a liam a, Raphinha kan hmu zui.

Barcelona forward hian Oviedo centre back David Costas tihsual nangchingin, Barca goal hnihna a khung. Raphinha hi hliam vanga hun engemaw chen a chawl chungin, Barca tan goal 12 a khung leh der tawh a, assist vawi nga a nei tel - heti zat goal thawk chhuak tur hian match 20 chiah a mamawh.

Hetah hian a la tawp mai lo. Minute 70-na a ni a, Lamine Yamal hun a inher chhuak - kum 18 mi forward hian rawlthar danglam bik a nihzia pholangin, Olmo-a ball pek chu bicycle kick hmangin goal-ah a chantir a, 3-0 in Barca an chak.

Catalan club hian Hansi Flick-a hnuaia league match mahni khelmuala an khelhah, match 10 chhung a zawnin hnehna an chang ta a, December 2019-a Ernesto Valverde hoa match 14 an lo chak zawn tawh nih rual turin match li an la mamawh.