New Zealand tan India an ṭha mah mah

Guwahati-ah India-in New Zealand wicket riatin an sawp a, chak turin over 10 chauh an mamawh. Men in Blue hian T20 match nga khelh turah match hmasa pathumah hnehna changin series an la a; January 28, Nilaini zan dar 7:00 hian Visakhapatnam-ah match lina an khel ang.

Pathianni zan inkhelhna hmun hi Assam Cricket Stadium, Barsapara a ni a, entu 46,000 lenna niin ticket an hralh zo vek. Helai hmun tho hi nikuma hmeichhe Cricket World Cup opening ceremony neihna kha a ni a, khami ṭum khan mi 22,843 an pung khawm. Mipa inkhel erawhin ngaihven a hlawh a, inkhelh hma darkar hnihah pawh stadium kawtah mipui an pung khawm nasa tawh hle.

India jersey hi adidas kut chhuak a ni a, showroom-ah chuan fan version pawh Rs 999 niin player version phei chu Rs 6,699 daih a ni a, mi nawlpui tan lei ngaihna a awm lo. Stadium kawtah jersey man tlawm a awm ṭeuh thung a, Rs 150-300 in a lei theih. Rohit Sharma leh Virat Kohli te tel lo mah se an an hming chuanna kawr erawh a la langsar hle.

Ticket man tlawm zarah stadium khata pungkhawm mipui zinga a zatve dawnin India jersey an ha thei a, inkhel boruak a tihnawm phah. Ṭhumvawrah India an chak a, rinlawk ang ngeiin vawm hmasak an thlang. New Zealand lamin beisei an pha lo a, Glenn Phillips-a'n 48 runs a siam zarah over 20-ah 153/9 runs an tlin hram.

India bowler chhuanvawr Jasprit Bumrah-a ball vawm kawh zet zet chu hmuhnawm a tling a, wicket pathum lain Black Caps-in an ngam lo. India bat hun a thleng a, ball khat lekah Sanju Samson thi nghal mah se mualneitu an buai phah lo.

Ishan Kishan-a'n six vawi hnih leh four vawi thum rawn vuain ball 13 lekah 28 runs a rawn siam a, batter ranking-a no. 1 ni mek Abhishek Sharma-a'n a thiam thil a pholang. Abhishek hming chuang kawr ha an ṭhahnem a, India opener hian hming a chher tawh hle tih a hriat theih. Kum 24 mi Abishek hian ball 14 lekah half century a siam a, four vawi sarih leh six vawi nga vaw chhuakin ball 20-ah 68 runs a siam.

Captain Suryakumar Yadav pawhin ball 26 lekah 57 runs a rawn siam a, over 10 lekah India-in 155/2 runs siamin hnehna an chang. February aṭangin T20 World Cup khelh a ni dawn a, champion lai India-in team ṭha New Zealand an sawp avangin inrintawkna an ngah phah sawt ang.