Juventus-in Napoli an sawp

Italian club lian pahnih Juventus leh Napoli te chu Pathianni zan khan an inkhel a, Juventus-in Jonathan David, Kenan Yildiz leh Filip Kostic te goal hmangin 3-0 in hnehna an chang a, table-ah panganaah awm chhunzawmin, Napoli an hnaih sawt.

Allianz Stadium-a inkhelah ṭan aṭangin mualneitu Juventus an hlauhawm nghal a, Francisco Conceicao leh Kephren Thuram ten goal chance nei nghalin goal erawh an thun thei lo. Minute 22-naah Juventus tan Canadian forward Jonathan David-a'n hmahruaina goal a khung a, Luciano Spaletti naute an hawikir tawh lo.

Kenan Yildiz-a'n minute 77-naah cool taka goal khungin an hmahruaina a belhchhah a, Turkish midfielder Yildiz hian tun season Serie A-ah goal sarih a khungna chiah a ni. Minute 86-naah Filip Kostic-a'n an chak nemnghehna goal a khung leh a, harsatna tawk loin Juventus an chak.

Napoli an hneh avangin Juventus hian an inkar chu point khatin an tizim a, Serie A-ah champion tum inelna bakah top four tlin tum inelna boruak a sang dawn chauh. Turin club hian naktuk zan dar 1:30-ah Monaco an tum dawn a, Juventus hi a sang pariat zinga tel phak an tum avangin UCL lamah pawh chet ṭhat chhunzawm an duh ang.

Napoli erawh Champions League lamah an che ṭha lo a, 25-naah awmin playoff khel lo thei dinhmunah an ding a, naktuk zan vek hian Chelsea an tum dawn.