Curry hoin Warriors-in Wolves an hneh

NBA regular season khelh mekah nimin zing khan Golden State Warriors chuan 111-85 in Minnesota Timberwolves an hneh a, Western Conference table-ah pariatnaah an awm mek.

Golden State thiampuipa Stephen Curry chuan point 26 leh assist vawi sarih a nei, NBA chanchina point score tam lamah John Havlicek chu khumin 20-naah a chho.

Target Center, Minneapolis-a inkhelah Warriors tan Curry a langsar a, American point guard Curry hian point 26 leh assist vawi sarih a nei a, a team tan a thawhhlawk hle. March thlaa kum 38 tling mai tur Curry hi a kum tam ve deuh tawh mah se court chhungah team innghahna ber a la ni. Curry bakah Moses Moody (19), Brandin Podziemski (12) leh De'Anthony Melton (12) te Warriors chak nan an ṭangkai bawk. Warriors hi Ningani zingah Utah Jazz an hmachhawn leh ang.

Timberwolves tan Anthony Edwards (32) leh Donte DiVincenzo (22) te che ṭha viau mah se an team chakpui nan a tawk zo lo a, a tlawm zawkah an ṭang. Wolves hi tun season-ah a zawna vawi nga an chak lohna chiah a ni a, Ningani zingah Dallas Mavericks lakah an record duhawm lo hi tihtawp an duh ang.