Roma lakah Milan an chak zo lo

Pathianni zan Serie A inkhelah AC Milan chuan AS Roma 1-1 in an inhnehtawkpui a, an mikhualna ramah Milan hi an chak zawh loh avangin an hmelma Inter Milan nen an inkar a zau sawt.

Stadio Olimpico-a inkhelah mualneitu team an hlauhawm zawk a, Roma tan Aston Villa aṭanga an hawh Donyell Malen-a'n chance nei ṭhin mah se, goal hmaah a hriam tawk loh avangin a hun neih a chhawr thei lo a, Milan keeper Mike Maignan a chet ṭhat ve bawk avangin first half-ah goal a lut lo.

Second half-ah Milan an insiamṭha a, ball pawh an chang hnem. Minute 62-naah Milan tan Luka Modric-a corner pet chu defender Koni De Winter-a'n a tauh lut a, hma an hruai - Massimiliano Allegri hoten halftime an hmang ṭha tih a hriat.

Mualneitu Roma-in awlsam taka tlawm an tum bik lo a, minute 74-naah Milan defender Davide Bartesaghi handball vangin penalty an hmu. Penalty hlawh chhuaktu Lorenzo Pellegrini-a'n an si phurh sut nan a hmang a, goal a chantir turin harsatna a nei lo. Goal an khung chhunzawm theih loh avangin team pahnihte point khatah an lungawi a ṭul.

Milan hian Roma an draw avang hian hmahruaitu an hmelma club Inter Milan nen an inthlauhna chu point nga a ni ta a, AC Milan hian champion an tum a nih chuan an chetsual a thiang tawh lo. Roma erawh point 43 hmuin Napoli lehpelin pathumnaah an chho a, Napoli nen an point hmuh zat inang mah se goal difference an nei ṭha zawk.