Goa-ah Aizawl FC-in huaisen rah seng

Aizawl FC chuan Thawhṭanni zan khan I League match inkhel pawimawh takah Indian Arrows 2-1 in an hneh a, khualmuala an chak vawi khatna a ni.

Mizo club tan hian substitute William Lalnunfela'n minute 64-naah hmahruaina goal a khung a, mualneitu lamin Vikram Pratap Singh hmangin minute 81-naah an sut. Injury time minute linaah William-a cross chu Joe Zoherliana'n ṭha zetin a tauh lut a, point thum hlu tak an hlawh chhuak.

Standly Rosario chhawr theih turin foreigner pali an awm tawh a, bul a ṭan nghal vek. Tlarhnungah Richard Kassaga awmin tlarhmaah captain Alfred Kemah Jaryan leh Abdoulaye Kanoute te an awm a, midfield-ah a vawi khat nan Amadou Alou Sissoko a inlan.

Aizawl FC hian first half an thunun a, goal chance insiam hnem mah se Abdoulaye Kanoute vanneih ṭum a ni lo, Malian striker hian Mizo club tana vawi hnih a inlanah goal a la khung lo. Second half-ah AFC-in inkhel an thunun rah an seng a, Isak Vanlalruatfela cross chu William-a'n goal-ah a chantir. Amaherawhchu minute 81-naah Arrows tan Vikram-a'n AFC defender Richard tlan pelin goal ṭha tak a khung. Ugandan defender hian hemi hma hian Vikram hi box chhungah a titluk tawh avangin a ti tlu nawn ngam tawh lo.

Injury time-ah Aizawl FC-in freekick an hmu a, Paul Ramfangzauva freekick aṭanga per chu Alfred-a'n khung lo mah se William-a'n changfuhin Kolasib tlangval cross ṭha tak chu Lengpui tlangval Zohera'n mawi fahranin a tauh lut. 

Aizawl FC hian hun tawp thlenga chak an tum rah sengin Goa-ah hnehna an chang. Mizo club hian December 17 leh 20 hian Chennai City leh Punjab FC te an mikhual dawn a, RG Stadium floodlight thar hnuaiah ve ve khelh a ni ang.