Zverev-a'n mumang ram aṭangin Tien a kai tho!

Mang rama cheng mek Learner Tien chu kaih harhin a awm ta - kum 20 mi Tien hi nimin khan Australian Open quarterfinal-ah a tlawm a, Alexander Zverev a ngam lo.

World no. 3 Zverev hian a vawi khat nana Grand Slam quarterfinal kheltu Tien hi 6-3 6-7 (5-7) 6-1 7-6 (7-3) in a hneh a, Rod Laver Arena-ah tawnhriat nei ṭha zawk a nihna a pholang.

Zverev hi tennis player langsar pawl ni mah se, Grand Slam erawh a la la ngai miah lo thung - tun hi semifinal a luh vawi 10-na a ni a, kum 2025-a final a lo khelh tawhna tournament-ah hian champion zui ngei a duh dawn.

Kum 28 mi Zverev chuan a khingpui Tien chu fak zuiin, "Learner kha baseline aṭanga a rawn khelh dan kha awihawm lo khawpin a ṭha zawk a ni. Hun rei tak chhung chu khatiang taka baseline aṭanga khel ṭha kha ka la tawng ngai lo," a ti thlawt.

American player Tien hi world no. 29 niin, tun hi Grand Slam inelna a hmachhawn tawha a thlen san ber a la ni - kum 20 chauh a la nih avangin hmabak a nei êng hle.

Zverev chuan, "Ace vawi 20 ngawt ka siam thei a, khatiang vang kha ni lo se chuan vawiinah hian ka chak kher lo ang - ka serve pawh a ṭha e," a ti a, khingpui thiam tak lakah a khelh ṭhat vanga chak a nih thu a sawi.

German mi Zverev hian Australian Open, French Open leh US Open-ah te final vawi khat ṭheuh lut tawhin, a chak lo vek a, Wimbledon bikah erawh fourth round vawi thum thleng tawhin, a aia sang a la thleng lo thung.

Hliamin a tlakbuak ngun ve tak Zverev chuan, "Tun hnai ni 10 chhung hi na nei lo ang maiin ka awm a, rei tak chhung chu hetianga hrisel hian ka awm lo tawh - thla 12 hnua na nei loa ka khelh hmasak ber a ni hial ang.

"Na neih miah loa ka inkhelh avangin court chhungah pawh khan nuam ti takin ka khelh phah a ni," a ti - kum 2022-a a inhliam phei chuan Zverev hi inkhel thei lo tur ang hiala ngaih a ni hman.

French Open semifinal-ah Rafael Nadal nen inkhelin a inhliam a, thla ruk ngawt a chawl. Mahse, ṭha takin a lo kir a, tunah phei chuan na nei miah loa a inkhelh theih thu a sawi ta.