Liverpool-in Robertson hralh dawn lo

Premier League champion Liverpool left back Andy Robertson chu Tottenham Hotspur-in dawr mah se, Reds hian an chhuahtir leh dawn lo niin khawthlang media-te chuan an tarlang.

Kum 31 mi Robertson hi Spurs chuan pound maktaduai ngaa lakluh tumin an dawr a, Liverpool hian hnar mai loin Scottish fullback chungchang hi an ngaihtuah a, tunah chuan hralh rih lo turin thutlukna an siam ta zawk.

Robertson hian Liverpool-ah khelhna hmun a chang ta meuh lo a, tun season-ah league match liah chiah inkhel bul a la ṭan. Hei vang hian amah ber pawh hian chhuah a hreh lo a, chhuah duhin club thuneitute erawh a nawr miah lo thung.

Kar hmasa lam kha chuan club pahnih hi a thuphungin an inrem tawh a, mahse, Reds hian Robertson hi an hralh dawn a nih chuan AS Roma lama loan-a khel mek Kostas Tsimikas chu koh kir an duh.

Mahse, Tsimikas hi an ko kir thei lo nia sawi a ni a, Robertson chhuah an phal ta lo - Jurgen Klopp-a hnuaia hming chher tak Robertson hian tun season bak Reds-ah hian contract a nei tawh lo a, hei vang hian a man pawh a tlawm lehzual.

Kum 2017 khan Hull City aṭangin Liverpool hi £8mtd-in a zawm a, Trent Alexander-Arnold nena an inkawp chu khawvela fullback inkawp hmuhnawm ber pawl a tling a, nomawi chawi theih ang chu an chawi kim.

Hei chauh a ni lo. Robertson hian Liverpool tan inelna hrang hrangah match 364 khelin goal 12 a khung a, assist vawi 68 a nei tel bawk.

Liverpool hian zanin dar 1:30-ah league match khel turin Qarabag an mikhual dawn a, Reds tan last 16 direct-a lut chiang turin hnehna chan a pawimawh dawn.

Merseyside club hian tlawm pawh ni se, knockout playoff chu an khel dawn chiang tawh sa a, mahse, last 16 khel tur top eight china awm tur erawhin chak a pawimawh - Anfield-a inkhel tur an nih avangin chakna chance a sang.

Chutihrual chuan Azerbaijani club Qarabag hian knockout playoff khelh an la beisei ve bawk a, league stage-a UCL mangṭha duh loin, Liverpool khelmualah chak an tum ngam dawn.