Real Madrid hmachhawn tur Benfica

Zanin Champions League inkhel turah Jose Mourinho enkawl Benfica-in Real Madrid an mikhual dawn a, Real hi vawi 15 champion ni mah se an tum tur hi Jose Mourinho enkawl a nih miau avangin inkhel hmuhnawm a beisei ngam.

Real hian point 12 hmuin table-ah pathumnaah an awm mek a, pathumnaah awm mah se 12-na Atalanta nen point 2 chauha an inthlauh avangin a sang pariat zingah an la awm chiang bik lo a, playoff khelh ngai loa round of 16 an lut duh a nih chuan Benfica an hneh a ngai.

Arvalo Arbeloa-a'n Real a enkawl tirhah an che fuh dawn loin a lang hman a, mahse match hnuhnung pathum an khelhah chak vekin team hlauhawm an ni leh tawh.

Real tan Kylian Mbappe chu an inghahna a ni leh dawn a, French forward Mbappe hian tun season UCL-ah goal 11 khung tawhin a khung hnem ber. Mbappe thlawp tur hian Vinicius Junior, Arda Guler leh tun hnaia che ṭha tak Franco Mastantuono te an awm dawn a, eng team tan pawh an huphurhawm.

Tlarhnung lamah hliam vangin Trent Alexander-Arnold, Eder Militao, Antonio Rudiger leh Ferland Mendy te khel thei dawn lo mah se Real Madrid squad a chhah ṭha a, anmahni thlaktu tur an awm avangin Benfica lakah hlauhthawnna tur a awm lo.

Benfica erawh point ruk hmuin table-ah 29-naah an awm a, playoff khel phak loa tla thei dinhmunah an ding. Benfica tan Nicolas Otamendi chu an innghahna a ni leh dawn a, Argentine defender hi a kum tam ve deuh tawh mah se tlarhnung lamah ban rinawm a la ni a, defending game larpuitu Jose Mourinho-a'n a hmang thiam hle, Real Madrid lakah thilmak thlentir an tum ang.