Last 16 beisei Barca hmaah Copenhagen

Spanish club lian Barcelona chuan zaninah Copenhagen an mikhual dawn a, Barcelona hian playoff khelh ngai loa round of 16 luh an tum laiin, an mikhual tur Copenhagen hian playoff khelh phak an tum ve thung a, Danish club tan Barca 'u' deuh mah se, dam khawchhuah nan chak an mamawh miau avangin thi leh thau pawlhin an bei ang.

Catalan club hi point 13 hmuin table-ah pakuanaah an awm mek a, a sang pariat zinga tel turin beiseina sang tak an nei. Inhliam vangin Ferran Torres, Gavi, Pedri leh Andreas Christensen te chu khel lo tur chiang sa an ni a, Frankie De Jong chu hrem vangin a inlan thei dawn lo bawk.

Hansi Flick-a tan tlarhma lamah duhthlan tur a tam, tun season Champions League-a goal nga khung tawh Fermin Lopez bakah Raphinha leh Lamine Yamal an awm dawn bawk a, anni bakah veteran striker Robert Lewandowski leh goal li khung tawh Marcus Rashford an la awm cheu bawk avangin chak turin an ṭha tawk.

Hetihlai hian Copenhagen-in player langsar kawl lo mah se Southampton forward hlui Mohamed Elyounoussi chu an innghahna a ni leh dawn a, Danish club hian awlsam taka Champions League mangṭha an duh dawn bik lo avangin an theih tawp an chhuah dawn a, khualmualah Barca hneh ngei an tum ang.