Everton chhanhimtu Barry

Thawhṭanni zan Premier League inkhelah Everton chuan Leeds United an mikhual a, mualneitu Everton zawk an chak dawn loa a lan hnuah French forward Thierny Barry goal hmangin an si phurh an sut a, 1-1 in an inhnehtawk.

Goodison park-a inkhelah mikhual team-in goal an khung hmasa zawk a, minute 28-naah Anton Stach-a ball cross chu James Justin-a'n chiang takin a pet goal a, Leeds-in hma an hruai. Goal an khung hnuah Leeds bawk kan hmu - Dominic Calvert-Lewin-a'n goal ban a pet per dawp a, Everton forward hlui Calvert-Lewin hian goal khung lo mah se a club hlui tan a hnawksak hle.

Second half-ah Everton an insiamṭha a, Toffees player ten vawi tam chance an hlah hnuah Barry a rawn lang a, French forward hian Irdrissa Gana Gueye ball cross nang fuhin hnai tak aṭangin an si phurh sutna goal a khung. Barry hian tun season Premier League-ah goal nga a khung tawh. Hun tawp dawnah Gueye-a'n chakna goal khung theihna chance nei mah se goal bar a pet per a, hun tawp zuiin team pahnihten point an insem.

David Moyes a naute hian point 33 hmuin table-ah 10-naah an awm a, point hmuh zat inangah an goal difference a ṭhat zawk avangin Sunderland chungah an awm. Leeds erawh point 26 hmuin 16-naah an awm a, relegation zone aṭangin point ruk chiahin an him.