Pakistan-in World Cup boycott dawn?

Thla thara khelh tur T20 World Cup boycott chungchangah Pakistan-in kar thar tir lam hian thutlukna an siam dawn. Thawhṭanni khan Pakistan Cricket Board (PCB) chairman Mohsin Naqvi leh prime minister Shahbaz Sharif te hemi chungchangah hian an indawr.

Naqvi chuan, "Inbiakna ṭha kan nei thei a, thil engkim ngaihtuah chunga thutlukna siam turin min hriattir. Thutlukna tawp hi tunkar Zirtawpni emaw Thawhṭanniah emaw kan siam ang," tiin a sawi.

Pakistan thuneitute hian inelna pumpui boycott loin India nena an inkhelh tur bik chauh boycott thlengin an ngaihtuah. Ram inhal pahnih hi group A-ah Namibia, Netherlands leh United States te nen an awm ho a, India leh Pakistan inkhel tur hi mipui hmuh châk ber a ni.

Ram buai avangin Shaheens leh Men in Blue te hi kum 2013 hnuaah inelna loah chuan an inkhel tawh lo a, India-in Pakistan a tlawh hnuhnung ber chu kum 2008 daih tawh kha a ni. Shaheens hian inelna hi an hmachhawn a nih chuan inremna awm sa angin India rama khel loin Sri Lanka-ah chauh an khel ang.

Bangladesh-in inelna hi an boycott tawh a, International Cricket Council (ICC) chuan an aiah tel lo zinga rank nei sang ber Scotland an dah lut. Bangladesh Cricket Board (BCB) chuan inelna neihna hmun tur India ram chu him tawk loah ngaiin Sri Lanka-a khelh an dil a, ICC lamin an remtihsak lo. BCB hian India rama khelh aiin World Cup-a inlan loh an thlang zawk.

Board of Control for Cricket (BCCI) lam pawh Bangladesh chungah an lawm lo a, IPL club Kolkata Knight Riders hnenah Bangladesh player Mustafizur Rahman chu squad aṭanga paih turin an hriattir. World Cup chauh ni loin inelna pawn lam chanchinin ngaihven tel ang.