Doncic point 46 nen Lakers an chak

NBA regular season khelh mekah nimin zing khan Los Angeles Lakers chuan Chicago Bulls chu 129-118 in an hneh a, Luka Doncic chu langsar leh berin point 46 teh meuh a score.

United Center, Chicago-a inkhelah Doncic chu Lakers hmachhuan a ni a, Slovenian point guard hian point 46, assist 12 a neih bakah rebound vawi riat lain, triple double a siam teuh hle. Doncic bakah hian Rui Hachimura-a'n point 23 a nei a, veteran player Lebron James chuan point 24 nei bawkin Lakers tan an ṭangkai hle. Lakers hi naktuk zingah LeBron James-a team hlui Cleveland Cavaliers nen an inkhel lehnghal dawn.

Bulls tan Coby White (23), Ayo Dosunmu (20), Josh Giddey (19) leh Nikola Vucevic (18) te che ṭha viau mah se Luka Doncic leh a hote an ngam lo a, Bulls chak nan a tawk zo lo. Bulls hi naktuk zing dar 5:30-ah Eastern Conference table-a 14-na Indiana Pacers nen an inhmachhawn leh dawn a, chak loh nawn an duh lo ang.