Fulham-in PSV forward Pepi an duh

Tun season Premier League-a che ṭha tak Fulham chuan PSV Eindhoven forward Ricardo Pepi chu lakluh an duh a, pound maktaduai 28-in an dawr. PSV hian pound maktaduai 30 chhiar mah se Fulham hian lakluh theih an inring.

Pepi hian tun season-a league match a khelh tawhah goal riat a khung tawh a, Champions League lamah pawh match ngaah goal thum khungin a che chhe lo hle.

Fulham hian tlarhma lamah duhthlan tur an ngah lo hle a, Rodrigo Muniz chu nikum November-a a inhliam hnuah a la inkhel thei lo a, an rinrawl ber Raul Jimenez hi kum 34 a nih ve tawh bakah, season tawpa contract zo mai tawh tur a nih bawk avangin Pepi an awt a, Craven Cottage lamah seng luh an duh.

Hetih lai hian Fulham winger Adama Traore chu chhuak tura ngaih a ni bawk a, Traore hian West Ham a pan dawn niin journalist rintlak Fabrizio Romano chuan social media-ah a tarlang. Fulham hian Spanish winger thlak nan hian Manchester City winger Oscar Bobb chu lak an tum nia sawi a awm a, inbiakna leh indawrna engmah a la awm lo thung.