Chennaiyin laka JFC chhantu Isaac

Indian Super League-ah coach thar Owen Coyle hoin Chennaiyin FC inkhel mah se an chak beiseina chu Isaac Vanmalsawma'n a tih thamral sak a, minute 89-naa a goal khung hmangin Jamshedpur FC chu point khat hlu tak a hlawhchhuahpui. 

South Indian club-in minute 26-naa Nerijus Valskis goal khung chu an chakpui tawh mai dawn niin an inngai a, mahse Jamshedpur tan bench aṭanga lo lut Isaac-a shot chuan Farukh Choudhary perin goal-ah a lut a, hun a tawp zui a, 1-1 in an inhnehtawk. 

Hnahthial tlangval goal shot hian Farukh-a kut a per ngei niin lang mah se referee-in a hmu lo a, Jamshedpur tan vanneihna a ni. Chennaiyin tan hian Lallianzuala Chhangte chuan minute 63-naah ṭha zetin ball tlan luhpui mah se goal-ah a chantir thei lo a, uiawm takin a hun ṭha a khawhral. 

Isaac hi  Limitless Player of the Match-ah thlan a ni a, Lianzuala chu Emerging Player of the Match atan thlan a ni bawk - JFC leh Chennaiyin inhnehtawk zanah Mizo hming a mawi.