FIFA Club World Cup khelh a ni dawn ta

Khawmualpui hrang hranga club champion te inelna FIFA Club World Cup chu zaninah khelh ṭan a ni dawn ta a, English club chanchin ngah Liverpool an inlan dawn avangin ṭum dang aiin tun inelna hian ngaihven a hlawh. 

Zanin dar 11:00-ah match hmasa ber hi khelh a ni dawn a, inelna thlengtu Qatar rama league sang ber Qatar Stars League champion Al-Sadd leh OFC Champions League nomawi chawitu Hienghène Sport te an inkhel ang. 

European champion Liverpool, South American Champions League nomawi chawitu Flamengo, Asian champion Al Hilal, Africa Champions League champion Esperance de Tunis, CONCACAF hnuaia Champions League nomawi chawitu Monterrey, OFC Champions League champion Hienghene leh QSL champion Al-Sadd te an inlan dawn. 

Zanina Al Sadd leh Hienghene inkhela chak zawk hian Monterrey chu second round-ah an hmachhawn leh dawn a, Al Hilal leh Esperance te chu second round-ah hian an inkhel ve bawk ang. 

UEFA Champions League nomawi chawitu Liverpool chu semifinal aṭangin an inlan ṭan ve dawn chauh a, second round-a Monterrey nena inkhela chak zawk chu an tum tur a nih avangin final an luh ngei a rinawm. Liverpool ang thoa semifinal lut chiang sa Flamengo chuan Al Hilal leh Esperance inkhela chak zawk chu final luh inchuhin an hmachhawn ve leh dawn a, Reds leh Flamengo te final-a kan hmuhna chance a sang hle. 

World Cup 2022 thleng tur Qatar-in Club World Cup an thleng dawn a, Asian champion ram tan khawvel huap inelna ropui ber ang hiala chhal tournament thleng tura an inpeih leh peih loh pholanna remchang a ni dawn. Doha khawpuiah match zawng zawng hi khelh vek tura ruahmanna siam a ni a, Jassim bin Hamad Stadium leh Khalifa International Stadium ten inkhel hi an thleng dawn. December 21-ah final chu Khalifa-in a thleng ang. 

Liverpool player-te chu Mizo zingah hrilh nawn kan ngai lo a, player langsar tak tak an ni hlawm. Goal a khung theih em avanga Gabigol tia an koh Gabriel Barbosa hi mipui tam tak mit fukna tur a ni dawn a, Flamengo striker hi European club tam takin an en thla ang. 

Kum 23 mi striker hi Europe-ah Inter Milan leh Benfica tan khel ve zuai mah se a hlawhtling lo a, an ram lamah a kir. Flamengo hi tun season Serie A leh Champions League-ah nomawi a chawipui a, match 57-ah goal 43 a khungsak. 

Club World Cup match hmasa bera inlan tur Al Sadd SC hi Barcelona legend Xavi enkawlna hnuaia khel an ni a, Atletico Madrid midfielder hlui Gabi tih loh khawvel huapa hriat hlawh khawp player langsar an kawl lem lo. 

OFC champion Hienghene Sport hi New Caledonia club an ni a, player langsar sawi tur an nei lo - an player tam zawk hi semi-professional an ni a, football khel chunga eizawnna dang nei an hlawm. Players hi an ram mi vek an ni bawk.