Match 15 chak zawn thei Bucks

Milwaukee Bucks chuan nimin zing khan Orlando Magic 110-101 in an hneh a, NBA regular season kal laiah Bucks hian match 15 zet chu a zawnin hnehna an chang ta - match 21 hnehna chang tawhin Eastern Conference hmahruaitu an ni.

Bucks tan hian NBA Most Valuable Player ni lai Giannis Antetokounmpo bawk a langsar. MVP hian point 32 a neih bakah rebounds vawi 15 lain double-double a nei, ani bakah hian point 20 neitu Khris Middleton chu hnehna an chan theih nana player pawimawh a ni ve bawk.

Inkhel dangah Russell Westbrook-a'n point 34 nei mah se Houston Rockets chak nan a tawk zo lo a, an khingpui Sacramento Kings lakah 119-118 in an tlawm - Rockets hian Ningani zing dar 5:30-ah Cleveland Cavaliers an hmachhawn leh ang.

LeBron James chhuah hnuah Cleveland Cavaliers hi an la chefuh hleithei lo, nimin zing khan Boston Celtics hmaah 110-88 in an chak lo, tun season chhungin Cavs hi vawi 18 ngawt an tlawm tawh a, match ngaah chiah hnehna an la chang ve a ni.

Golden State Warriors pawh an ropui lo chhunzawm, vawi 20 an chak lohna turin Memphis Grizzlies chu 110-102 in an ngam lo. Steve Kerr-a naute tan playoff khelh phak ringawt pawh sawi rik ngam chi a ni rih lo.