Olympic medal humhim tumtu Carolina Marin

Carolina Marin chuan hliam vangin kuminah buaina nei hnem mah se a beidawng lo a, nakkum nipui laia neih tur Tokyo Olympic-ah chuan gold medal a kawl lai humhim theih ngei a tum thu a sawi.

Spanish nula hi a ke hliam vangin tun season-ah thla riat chhung a chawlh a ngai hial. Tun hnaiah dam leh tawh mah se a la inkhel tam tawk lo, January thlaa neih tur Pro Badminton League-ah pawh a inlan thei dawn lo.

World number 1 hlui Marin chuan, "Na takin ka ke a hliam tih ka hriat kha chuan ka rilru a na takzet a, beiseina ka nei tlemin Olympic pawh ka khelh theih ka ring lo hial. Mahse, enkawlna ka dawng ṭha a, hma hun pawh beiseina nen ka thlir leh mek tawh.

"Ka khelh dan phungah thlak danglam tum ka nei lem lo, ka inkhelh mumal theih loh lai khan training ka nei tho a, a bik takin net-play chungchangah hma ka sawn, tun hma aia player ṭha lehzual zawk ka nih theih nan inzirna hun ka nei hnemah ka ngai," tiin a hliam chu hlawk nan hman a beisei.

Kum 26 mi Marin hian harsatna lian tak a nei a nih loh chuan India rama badminton inelna lian hi a hmachhawn ṭhin, tun ṭuma a inlan thei lo tur pawh pawi a ti hle. Marin chuan, "India rama ka fans leh badminton ngainatute an ngaihawm hle, season lo awm leh turah kan inhmuh ngei ka ring," tiin a sawi.