Hansi Flick tan zan danglam

Pathianni zan dar 8:00 hian RheinEnergieStadion-ah Bayern Munich-in mualneitu FC Cologne an hmachhawn dawn. Bavarians manager Hansi Flick hian a inkhelh hun laiin Bayern leh Cologne tan a khelh ve ve tawh avangin zan danglam tak a ni ang.

February 24, 1965-a piang Flick hi an khaw club SV Sandhausenaṭangin a inzir chhuak a, kum 1985 khan kum 20 mi niin Bayern Munich a zawm. Bavarians tan hian midfielder Flick hian match 139 a khel a, Bundesliga-ah season nga chhungin vawi li a champion, DFB Pokal nomawi vawi khat achawi bawk.

Bayern aṭangin Flick hian FC Cologne hi kum 1990 khan a zawm a, season thum chhungin match 54-ah a inlan a, DFB Pokal final ṭum khat a thlenpui. Amaherawhchu 1991 final-ah hian hrem vangin Flick hi a inlan lo a, penalty shootout-ah Werder Bremen 4-3 in an hneh lo. 

Cologne hnu hian club tenau Victoria Bammental tan a khel a, amaherawhchu Flick hi hliam vanga a buai chhoh reng avangin kum 28 lek a nihin football khelh a chawlhsan. Kum 54 mi Flick hian Bayern coach ni chungin a vawi khat nan a club hlui FC Colonge a hmachhawn dawn a, Cologne sporting director Horst Heldt chu a teammate ṭhin a ni.

Bayern manager Hansi Flick tan zan danglam tak a ni dawn a, Bundesliga table thlirin inkhel pawimawh tak a ni tel bawk dawn. Zanin hian RB Leipzig-in Werder Bremen an mikhual dawn a, hnehna an chang a nih chuan Bayern chungah an awm thei ang. Bavarians an inlan meuh chuan pahnihna nichungin an khel thei tihna a ni a, nomawi inchuh boruak a sang hle.