Team lian kan la el phak lo - Pep

Manchester City boss Pep Guardiola chuan an tan club lian el a la harsat thu a sawi chhuak a, "Kan tih theih chu kan chak lohna pawm a, hmasawn tura ke pen hi a ni," tiin a sawi. 

Pep chuan, "Liverpool, Man-chester United, Barcelona, Real Madrid leh Juventus te chuan attack turin theihna an nei a, tlarhnung a him tho a, counter attack an thiam tho bawk si. Anni ho hi kan el tur chu an ni bawk si a, mahse kan theihnain a la tlin ve lo a ni. 

"Kan ṭha lo zawk tih hi huaisen taka kan pawm ngam a ṭul a, thil tak tak hi lungawi takin pawm mai ila, hmasawn tura ke pen kan ngai a ni," a ti! Manchester City hi tun hnai season hnihah Premier League champion an ni a, mahse an duh ber Champions League quarterfinal-ah Liverpool leh Tottenham Hotspur ngam loin an tlawm thung. 

Tun season Premier League-ah beisei an phak lo a, match 16 khelhah vawi li tlawm tawhin hmahruaitu Liverpool chu point 14 ngawtin an phak lo tawh. Guardiola chuan, "Kan tihsual avangin point 14-in kan hnufual a, kan khingpuite quality san vang a ni pakhat bawk. Mahse, chawl loa kan kal zel a ngai a ni," a ti. 

City hian Champions League-ah last 16 an lut chiang tawh a, zanin dar 11:25-ah an group stage match tawp ber khel turin Dinamo Zagreb chu an lenchilh ang. Pep chuan, "Champions League nomawi chawi lam kan ngaihtuah lo. Kan point mamawh zat leh khingpui ten an hloh tur zat pawh ka ngaihtuah lo. Chak zel kan duh a ni tawp mai," a ti. 

City awmna group C inkhel dangah Shakhtar Donetsk chuan zan dar 11:25-ah vek Atalanta an mikhual dawn a, Dinamo nen club pathum hian last 16 luta City hnung zui an la beisei vek. Shakhtar dinhmun a ṭha ber a, Ukrainian club hian Atalanta an hneh chuan an tlang ang - Dinamo tan City hneh a, Shakhtar-in Atalanta an hneh loh bawk a ngai a, Atalanta hian Shakhtar an hneh a, City-in Dinamo an hneh bawk chuan Italian club an tlang daih ang.