BVT leh Chanmari West an intiat

Bethlehem Vengthlang FC-in minute ngana lekah Lal-rammuanpuia (Apuia) hmangin hma hruai mah se, minute thum hnuah Laldampuia hmangin Chanmari West-in an sut. Goal dang a luh belh tawh lo - second leg a ngaihnawm sawt dawn.

Mizoram Premier League Season 5 semifinal Ningani zana khelhah BVT leh West Warrior 1-1 in an inhnehtawk. December 8, Ninganiah second leg khelh a ni dawn a, away goal rule leh extra time a awm loh avangin team pahnih inkarah chungnung zawk an la awm rih lo.

An fimkhur hmasa

BVT coach Lalbiaksanga Colney leh Chanmari West boss HC Zarzoliana ten chak ngei an tum thu an sawi lawk a, an player rem danah erawh 'chak tumna' aiin 'chak loh pumpelh tumna' a lian zawk - defensive midfielder pahnih an chhawr ve ve.

BVT-in hliam damkawr captain Laldingngheta chu bench-ah dahin player thar Zo-than-puia chu defence laiah Lal-hlimpuia nen an inkawptir a. Lalhlima nena tlarhnunga awm Laldinpuia'n khelhna hmun a la chang tho a, Samson Ramengmawia leh Lalrintluanga (Tuka) te nen midfield-ah awmin goal venhim an tum tih a chiang.

West Warrior-in Chhing--a Veng an hneh ṭuma hnawh-chhuah Ramengmawia aiah H. Lallianzama an luhtir bak tih danglam an nei lo a, tlarhnung pui turin Reuben Zosangpuia leh K. Lalnunzama (Valtea) te bawk hman a ni.

A goal hma

Ṭan aṭanga minute ngana lekah Laldinliana Varte corner pet chu vengtu nei lo Apuia'n chiang takin a tauh goal nghal. Amaherawhchu minute thum hnuah BVT goalkeeper Malsawmdawngzela'n Chan-mari West captain Laldampuia zawnah kher ball a tiper a, Kawrtethawveng tlangval hian 'cool' taka Khawzawl tlangval pet khumin goal a khung.

Armed Veng South tlangval Apuia'n tun season-ah goal nga khungin BVT top scorer a ni mek a, Dampuia'n goal 11 khungin MPL-a goal khung tam ber a ni bawk.

Chanmari West forward Lianzama'n goal khung belh theihna hun ṭha ṭum hnih chu goal zawnah a pet lo ve ve a. Dampuia'n BVT right back Lalmalsawma tihsual avanga a zawna ball tla chu a hman hmawh hret avangin keeper Mala tan harsa tur khawpin a pet lo.

BVT lam tan Lalnunmawia'n a chance ṭha neih chu hun a mamawh tam avangin West Warrior defen-der-ten an tibuai hman a, left back Hming-thanmawia cross chu Chanmari West defender R. Lalawmpuia'n (Mapuia) dang perin a goal teuh hle.

Danmawia a inhliam

Second half-ah BVT keeper Mala a insiamṭha a, West War-rior midfielder Valtea ball pet kawh ṭha tak chu a dang ṭha hle. Amaherawhchu hun chanve hnu lam inkhelin beisei a pha lo - goal thun tumna aiin chhuah loh tumna a lian zawk - team pahnihin vawi khat ve ve chiah goal-ah an pet a, BVT phei chuan goal zawnah an pet lo.

BS-a'n chak tumin captain Dingngheta bakah PC Zosanga leh Lalmawizuala te luhtir mah se West Warrior-in inkhel an thunun hman avangin awmzia a awm pha tawh lo. Chanmari West tana pawi ber erawh inhliam vangin Danmawia minute 72-naah lakchhuah a ni a, Sialhawk tlangval hi second leg-ah a awm lo a nih chuan a pawi thui thei.

Eng nge an sawi?

BVT coach BS-a chuan, "Keeper tihsual vangin kan lamah an ti goal a, chak phu zawk kan ni. Kan naute khelh danah ka lawm a, keeper Mala pawh ka fuih a, second half-ah inrintawkna a hloh lo tih a rawn pholang," tiin a sawi.

Chanmari West coach HC Zarzoliana chuan, "Kan khelh chhiat ber ṭum ni hialin ka hria. Chutihrualin chak phu zawk chu awm se chak zawk an awm ang. Final luh ngei tumin kan inpuahchah ang," tiin chak phu zawk an awm loh thu a sawi.

Tute nge inlan?

Bethlehem VT (4-5-1) : Malsawmdawngzela; K. Lalmalsawma, H. Lalhlimpuia, Zothanpuia, Hmingthanmawia; Laldinliana Varte, Lalrintluanga, Samson Ramengmawia (Lalmawizuala 73'), PC Laldinpuia (PC Zosangliana 82'), Lalnunmawia (Laldingngheta 65'); Lalrammuanpuia.

Chanmari West (4-2-3-1) : Lalruatpuia; Racy K Lalremmawia, Toky Zomuanpuia, R. Lalawmpuia, Vanlalzuia Hnamte; Reuben Zosangpuia (Lalmuansanga 60'), K. Lalnunzama; R. Laldanmawia (R. Lalremruata 72'), Lalbiakhlua, Laldampuia; H. Lallianzama (Lalmuanzuala 60').

ZoFooty Statistics

Bethlehem VT 1 - 1 Chanmari West

BVT : Lalrammuanpuia 5'

CWFC : Laldampuia 8'

MoM: Vanlalzuia Hnamte, CWFC

48% Ball Possession 52%

7 Shots 9

3 On Target 7

0 Yellow Cards 1

0 Red Cards 0

Powered By Rainbow Multibrand

Mobile Showroom